ວັນທີ 22 ພຶດສະພານີ້, ຢູ່ນະຄອນຫຼວງປັກກິ່ງ, ທ່ານ ຢາງເຈຊື ກຳມະການກົມການເມືອງສູນກາງພັກກອມມູນິດຈີນ, ຫົວໜ້າຫ້ອງການຄະນະກຳມະການວຽກງານການຕ່າງປະເທດສູນກາງຈີນ ໄດ້ພົບປະກັບທ່ານ ນີໂກໄລ ພາທຣູເຊັຟ ເລຂາທິການຄະນະກຳມະການຄວາມໝັ້ນຄົງຣັດເຊຍ.
ໂອກາດນີ້, ທ່ານ ຢາງເຈຊື ກ່າວວ່າ, ພາຍໃຕ້ການນຳພາທາງຍຸດທະສາດຂອງທ່ານ ສີຈິ້ນຜິງ ປະທານປະເທດຈີນ ແລະ ທ່ານ ວລາດີເມຍ ປູຕິນ ປະທານາທິບໍດີຣັດເຊຍ, ສາຍພົວພັນຄູ່ປະສານງານຍຸດທະສາດຮອບດ້ານຈີນ-ຣັດເຊຍ ໄດ້ຂະຫຍາຍຕົວໄປໜ້າໃນລະດັບສູງ ແລະໄດ້ຮັບຜົນງານໃໝ່ທີ່ສຳຄັນ. ພາຍໃຕ້ສະຖານະການໃໝ່, ສອງຝ່າຍຈະເພີ່ມທະວີການສະໜັບສະໜູນກັນ, ເປີດກວ້າງການຮ່ວມມືທີ່ແທດເໝາະກັບຕົວຈິງ, ຮັດແໜ້ນການປະສານສົມທົບກັນໃນວຽກງານສາກົນ, ປະກອບສ່ວນໃຫຍ່ກວ່າເກົ່າເພື່ອຊຸກຍູ້ການພັດທະນາສອງປະເທດ, ປົກປັກຮັກສາສັນຕິພາບແລະສະຖຽນລະພາບຂອງພາກພື້ນກໍຄືຂອງໂລກ.
ທ່ານ ພາທຣູເຊັຟ ກ່າວວ່າ, ຍາມໃດ, ຣັດເຊຍກໍສຸມໃສ່ລົງເລິກສາຍພົວພັນຄູ່ປະສານງານຍຸດທະສາດຮອບດ້ານກັບຈີນ, ຍິນດີຮ່ວມກັບຈີນ, ຕັ້ງໜ້າຈັດຕັ້ງປະຕິບັດຄວາມເປັນເອກະພາບກັນຂອງປະມຸກລັດສອງປະເທດ, ເພີ່ມທະວີການຮ່ວມມືໃນທຸກຂົງເຂດ ແລະຊຸກຍູ້ສາຍພົວພັນສອງປະເທດໃຫ້ຂະຫຍາຍຕົວຍິ່ງໃຫຍ່ກວ່າເກົ່າ.