ຕາມຂ່າວCRI: ຕໍ່ກໍລະນີທີ່ອາເມລິກາຮຽກຮ້ອງໃຫ້ຈັດການເຈລະຈາສັນຍາສາກົນໃໝ່ກ່ຽວກັບບັນຫານິວເຄລຍອີຣານ, ວັນທີ 23 ພຶດສະພານີ້, ຢູ່ປັກກິ່ງ, ທ່ານ ລູ້ຄ່າງ ໂຄສົກກະຊວງການຕ່າງປະເທດຈີນກ່າວວ່າ, ພຶດຕິກຳໃນໄລຍະ 3 ປີຜ່ານມາໄດ້ຢັ້ງຢືນຢ່າງເຕັມສ່ວນວ່າສັນຍາຮອບດ້ານກ່ຽວກັບບັນຫານິວເຄລຍອີຣານແມ່ນມີປະສິດທິຜົນ. ຈີນຈະສືບຕໍ່ຍຶດຖືທ່າທີພາວະວິໃສ,ຍຸຕິທຳແລະມີຄວາມຮັບຜິດຊອບ,ຮັກສາການປຶກສາຫາລືແລະການເຈລະຈາກັບທຸກຝ່າຍທີ່ກ່ຽວຂ້ອງ,ສຸມໃສ່ປົກປັກຮັກສາແລະປະຕິບັດສັນຍາຮອບດ້ານກ່ຽວກັບບັນຫານິວເຄລຍອີຣານ.
ກ່ອນໜ້ານີ້ບໍ່ດົນ, ທ່ານ ໄມຄ໌ ພົມເພວ ລັດຖະມົນຕີກະຊວງການຕ່າງປະເທດອາເມລິກາໄດ້ປະກາດຍຸດທະສາດໃໝ່ທີ່ອາເມລິກາປະຕິບັດຕໍ່ອີຣານຫຼັງຈາກອາເມລິກາຖອນອອກຈາກສັນຍາຮອບດ້ານກ່ຽວກັບບັນຫານິວເຄລຍ ອີຣານ ໂດຍຮຽກຮ້ອງໃຫ້ດຳເນີນການເຈລະຈາສັນຍາສາກົນໃໝ່ກ່ຽວກັບການແກ້ໄຂບັນຫານິວເຄລຍອີຣານຢ່າງຮອບດ້ານ. ອີຣານໄດ້ຕອບໂຕ້ຢ່າງຮຸນແຮງຕໍ່ເລື່ອງນີ້,ປະຊາຄົມໂລກກໍ່ໄດ້ມີສຽງທີ່ແຕກຕ່າງກັນ.