ຕາມຂ່າວ CRI: ວັນທີ 23 ພຶດສະພານີ້, ທ່ານວາງຢີ້ ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນໄດ້ສິ້ນສຸດການຢ້ຽມຢາມອາກຊັງຕິນແລະກັບຄືນປະເທດຈີນ, ໃນເວລາແວໄປນະຄອນຫຼວງວໍຊິງຕັນສະຫະລັດອາເມລິກາ, ທ່ານໄດ້ພົບປະກັບທ່ານໄມຄົນ ພົມເພວ ລັດຖະມົນຕີກະຊວງການຕ່າງປະເທດອາເມລິກາ. ແລະຫຼັງການພົບປະສອງຝ່າຍໄດ້ຮ່ວມກັນພົບປະກັບນັກຂ່າວ.
ທ່ານຫວາງຢີ້ ກ່າວວ່າ, ຂ້າພະເຈົ້າໄດ້ພົບປະຫາລືກັບທ່ານພົມເພວຢ່າງກົງໄປກົງມາແລະເລິກເຊິ່ງ. ພວມເຮົາລ້ວນແຕ່ເຫັນວ່າ, ການພົວພັນຈີນ-ອາເມລິກາເປັນການພົວພັນທີ່ສຳຄັນທີ່ສຸດສຳລັບສອງຝ່າຍ. ຄວາມຕ້ອງການການຮ່ວມມືລະຫວ່າງຈີນແລະອາເມລິກາໃຫຍ່ກວ່າຄວາມຂັດແຍ້ງກັນຢ່າງຫຼວງຫຼາຍ, ໂອກາດທີ່ສອງປະເທດຜະເຊີນໜ້າກໍຫຼາຍກວ່າການທ້າທາຍ.
ສອງຝ່າຍໄດ້ຕີລາຄາສູງຕໍ່ບົດບາດນຳພາທາງຍຸດທະສາດຂອງປະມຸກລັດສອງປະເທດ ສາຍພົວພັນລະຫວ່າງສອງປະເທດ, ຍິນດີຈັດຕັ້ງປະຕິບັດຄວາມເປັນເອກະພາບຕ່າງໆທີ່ປະມຸກລັດສອງປະເທດຕົກລົງກັນໃຫ້ມີປະສິດທິຜົນ, ເຄົາລົບນັບຖືຜົນປະໂຫຍດໃຈກາງແລະຄວາມເປັນຫ່ວງສຳຄັນເຊິ່ງກັນແລະກັນ, ແກ້ໄຂບັນຫາໄຕ້ຫວັນແລະບັນຫາອ່ອນໄຫວອື່ນໆຢ່າງເໝາະສົມ, ກຳຈັດສິ່ງກີດຂວາງແລະຜ່ານຜ່າຄວາມຫຍຸ້ງຍາກ, ຮ່ວມກັນຊຸກຍູ້ໃຫ້ການພົວພັນລະຫວ່າງສອງປະເທດຂະຫຍາຍໄປໜ້າຢ່າງປອດໃສແລະໝັ້ນທ່ຽງ.
ທ່ານຫວາງຢີ້ກ່າວຕື່ມວ່າ, ພວກເຮົາລ້ວນແຕ່ເຫັນວ່າການປຶກສາຫາລືຢ່າງຕໍ່ເນື່ອງກ່ຽວກັບບັນຫາການຄ້າລະຫວ່າງຄະນະຜູ້ແທນສອງຝ່າຍມີລັກສະນະສ້າງສັນ, ແລະໄດ້ຮັບໝາກຜົນງານຕັ້ງໜ້າແລະສຳຄັນ.
 |
