ວັນທີ 22 ພຶດສະພານີ້, ທ່ານກູເຕີເຣສ ເລຂາທິການໃຫຍ່ອົງການສະຫະປະຊາຊາດກ່າວວ່າ: ການປະທະກັນໃນທົ່ວໂລກໄດ້ສ້າງຄວາມທຸກທໍລະມາໃຫ້ແກ່ປະຊາຊົນຢ່າງຫຼວງຫຼາຍ, ສະນັ້ນ ວິທີປົກປ້ອງປະຊາຊົນທີ່ມີປະສິດທິຜົນດີທີ່ສຸດກໍແມ່ນປ້ອງກັນ ແລະຢຸດຕິການປະທະກັນ.
ທ່ານໄດ້ກ່າວຕື່ມໃນກອງປະຊຸມອະພິປາຍເປີດເຜີຍຂອງສະພາຄວາມໝັ້ນຄົງກ່ຽວກັບການປົກປ້ອງປະຊາຊົນແນວໃດໃນການປະທະກັນທີ່ຈັດຂຶ້ນໃນວັນທີ 22 ພຶດສະພານີ້ວ່າ: ການປະທະກັນໄດ້ເຮັດໃຫ້ມີປະຊາຊົນຫຼາຍກວ່າ 128 ລ້ານຄົນໃນທົ່ວໂລກຕ້ອງໄດ້ຮັບການຊ່ວຍເຫຼືອດ້ານມະນຸດສະທຳ. ປີກາຍນີ້, ສະຖິຕິຈາກອົງການສປຊຕໍ່ 6 ປະເທດ ຄື: ອັຟການິສະຖານ, ອາຟຣິກາກາງ, ກົງໂກ, ອີຣັກ, ໂຊມາລີ ແລະເຢແມນໄດ້ສະແດງໃຫ້ເຫັນວ່າ ມີປະຊາຊົນຫຼາຍວ່າ 2 ໝື່ນ 6 ພັນຄົນເສຍຊີວິດ ຫຼື ຖືກບາດເຈັບຍ້ອນການປະທະກັນ.
ທ່ານເນັ້ນວ່າ: ວິທີປົກປ້ອງປະຊາຊົນທີ່ມີປະສິດທິຜົນທີ່ດີທີ່ສຸດກໍແມ່ນປ້ອງກັນ ແລະຢຸດຕິການປະທະກັນ. ອົງການສປຊຈະກຳນົດເອົາການປ້ອງກັນການປະທະກັນເປັນບູລິມະສິດ ແລະຮຽກຮ້ອງໃຫ້ບັນດາປະເທດໃນທົ່ວໂລກກຳນົດນະໂຍບາຍທີ່ກ່ຽວຂ້ອງ ເພື່ອປົກປ້ອງປະຊາຊົນໃນເຫດການປະທະກັນ.
