ທ່ານ ສີຈິ້ນຜິງ ເນັ້ນບົດບາດວຽກງານກວດສອບໃນລະບົບກວດກາຂອງພັກແລະລັດ
2018-05-24 16:18:40 cri
ຕອນບ່າຍວັນທີ 23 ພຶດສະພານີ້, ທ່ານ ສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງ, ປະທານຄະນະກຳມະການກວດສອບສູນກາງຈີນ ໄດ້ເປັນປະທານໄຂກອງປະຊຸມຄະນະກຳມະການກວດສອບສູນກາງຄັ້ງທຳອິດ ແລະກ່າວປາໄສສຳຄັນ. ທ່ານເນັ້ນວ່າ, ການປະຕິຮູບໂຄງປະກອບຄຸ້ມຄອງການກວດສອບ ແລະສ້າງຕັ້ງຄະນະກຳມະການກວດສອບສູນກາງນັ້ນ ແມ່ນມາດຕະການອັນໃຫຍ່ຫຼວງໃນການເພີ່ມທະວີການນຳພາຂອງພັກຕໍ່ວຽກງານກວດສອບ. ຕ້ອງຈັດຕັ້ງປະຕິບັດຄວາມຮຽກຮ້ອງຕ້ອງການຂອງສູນກາງພັກຕໍ່ວຽກງານກວດສອບ, ເພີ່ມທະວີການປະສານງານວຽກງານກວດສອບທົ່ວປະເທດຢ່າງເປັນເອກະພາບກັນ, ຈັດສັນຊັບພະຍາກອນດ້ານການກວດສອບໃຫ້ດີຂຶ້ນ, ເຮັດເຖິງຂັ້ນກວດສອບທຸກບັນຫາທີ່ຄວນກວດສອບ, ຕ້ອງກວດສອບທຸກບັນຫາຢ່າງເຂັ້ມງວດ, ລົງໂທດຜູ້ຮັບຜິດຊອບຢ່າງເຄັ່ງຄັດ, ພະຍາຍາມສ້າງລະບົບກວດສອບ-ກວດກາທີ່ໂຮມສູນຢ່າງເປັນເອກະພາບກັນ, ປົກຄຸມຮອບດ້ານ, ມີອິດທິພົນ ແລະມີປະສິດທິພາບສູງ, ເສີມຂະຫຍາຍບົດບາດອັນສຳຄັນຂອງການກວດສອບໃນລະບົບກວດກາຂອງພັກແລະລັດໃຫ້ດີກວ່າເກົ່າ.
