ວັນທີ 24 ພຶດສະພານີ້ ຢູ່ນະຄອນຫຼວງປັກກິ່ງ, ທ່ານຫຼີເຄີ້ສຽງ ນາຍົກລັດຖະມົນຕີຈີນ ໄດ້ພົບປະກັບທ່ານນາງແອງເຈີລາ ເມີແຄວ ນາຍົກລັດຖະມົນຕີເຢຍລະມັນ ໂອກາດເດີນທາງຢ້ຽມຢາມຈີນ ທ່ານຫຼີເຄີ້ສຽງ ກ່າວວ່າ: ລັດຖະບານຊຸດໃໝ່ຂອງຈີນແລະເຢຍລະມັນ ຄວນພະຍາຍາມຮ່ວມກັນ ແລະເພີ່ມທະວີການວາງແຜນ ເພື່ອຊຸກຍູ້ໃຫ້ສອງຝ່າຍເພີ່ມທະວີການຮ່ວມມືແບບຕ່າງຝ່າຍຕ່າງມີຜົນປະໂຫຍດໃນຂົງເຂດຕ່າງໆ ແລະຮ່ວມກັນສ້າງຫົວຈັກໃໝ່ແຫ່ງການຮ່ວມມືຈີນ-ເຢຍລະມັນ.
ທ່ານຫຼີເຄີ້ສຽງ ກ່າວຕື່ມວ່າ: ຈີນແລະເຢຍລະມັນຄວນເຊື່ອມຕໍ່ກັນຢ່າງຮອບດ້ານ, ເພີ່ມທະວີການແລກປ່ຽນໃນຂົງເຂດຕ່າງໆ ເຊັ່ນ ການເງິນ-ການທະນາຄານ, ການຄ້າ, ການລົງທຶນ ແລະ ຄວາມໝັ້ນຄົງ ຮ່ວມກັນສ້າງ "ແຜນທີ່ເສັ້ນທາງ" ໃໝ່ແຫ່ງການຮ່ວມມືລະຫວ່າງສອງຝ່າຍໃນອະນາຄົດ ໃນສະຖານະການປັດຈຸບັນນີ້, ຈີນຄອງຄອຍການຊຸກຍູ້ການເຈລະຈາສັນຍາການລົງທຶນຈີນ-ເອີຣົບ, ຍິນດີຮ່ວມກັບເອີຣົບຕັ້ງໜ້າລິເລີ່ມລັດທິຫຼາຍຝ່າຍ, ຮ່ວມກັນປົກປັກຮັກສາກົນໄກການຄ້າຫຼາຍຝ່າຍບົນພື້ນຖານກົດລະບຽບ ແລະ ຊຸກຍູ້ການຄ້າແລະການລົງທຶນໃຫ້ມີຄວາມສະດວກແລະເສລີພາບຫຼາຍຂຶ້ນກວ່າເກົ່າ.
ທ່ານນາງແອງເຈີລາ ເມີແຄວ ນາຍົກລັດຖະມົນຕີເຢຍລະມັນ ກ່າວວ່າ: ປະເທດຕົນໃຫ້ຄວາມສຳຄັນສູງຕໍ່ການພົວພັນກັບຈີນ ການທີ່ສອງຝ່າຍຮັກສາການແລກປ່ຽນຢ່າງແໜ້ນແຟ້ນ ແລະການຢ້ຽມຢາມກັນລະຫວ່າງການນຳຂັ້ນສູງໃຫ້ຖີ່ຂຶ້ນມີຄວາມສຳຄັນຫຼາຍ ຈຶ່ງມີຄວາມຫວັງຕໍ່ການປຶກສາຫາລືລະຫວ່າງລັດຖະບານສອງປະເທດຮອບໃໝ່ທີ່ຈະຈັດຂຶ້ນຢູ່ເຢຍລະມັນໃນອີກບໍ່ດົນຂ້າງໜ້ານີ້ ແລະຫວັງວ່າການສົນທະນາລະຫວ່າງການນຳທຸກຂັ້ນຂອງສອງປະເທດຈະມີຂຶ້ນເປັນປະຈຳ. ນອກນີ້, ເຢຍລະມັນຍິນດີເພີ່ມທະວີການຮ່ວມມືກັບຈີນໃນຂົງເຂດຕ່າງໆ ເຊັ່ນ ເສດຖະກິດການຄ້າ, ວິທະຍາສາດ-ເຕັກນິກ ແລະ ລົດບໍ່ມີຄົນຂັບ.
