ລັດຖະບານບູກີນາຟາໂຊອອກຖະແຫຼງການຕົກລົງຕັດສາຍພົວພັນກັບໄຕ້ຫວັນ

ລັດຖະບານບູກີນາຟາໂຊອອກຖະແຫຼງການໃນວັນທີ 24 ພຶດສະພານີ້, ປະກາດຕັດສາຍພົວພັນກັບໄຕ້ຫວັນເລີ່ມແຕ່ມື້ດັ່ງກ່າວເປັນຕົ້ນໄປ. ໃນໂອກາດຕອບຄຳຖາມທີ່ກ່ຽວຂ້ອງຂອງນັກຂ່າວໃນວັນທີ 24 ພຶດສະພານີ້, ທ່ານລູ້ຄ່າງ, ໂຄສົກກະຊວງການຕ່າງປະເທດຈີນກ່າວວ່າ, ຈີນໄດ້ເອົາໃຈໃສ່ຖະແຫຼງການທີ່ລັດຖະບານບູກີນາຟາໂຊປະກາດ, ແລະສະແດງຄວາມຊົມເຊີຍຕໍ່ເລື່ອງນີ້.

ທ່ານລູ້ຄ່າງ ກ່າວວ່າ, ມະຕິເລກທີ 2758 ທີ່ສະມັດຊາໃຫຍ່ອົງການສະຫະປະຊາຊາດຊຸດທີ 26 ຜ່ານການຮັບຮອງເມື່ອເດືອນຕຸລາປີ 1971 ໄດ້ກຳນົດຢ່າງຈະແຈ້ງວ່າລັດຖະບານສາທາລະນະລັດປະຊາຊົນຈີນແມ່ນລັດຖະບານຊອບດ້ວຍກົດໝາຍພຽງໜຶ່ງດຽວທີ່ສາມາດຕາງໜ້າທົ່ວປະເທດຈີນ. ຫຼັກການປະເທດຈີນດຽວທີ່ມະຕິດັ່ງກ່າວກຳນົດໄວ້ໄດ້ຖືກຍອມຮັບທົ່ວໄປຈາກປະຊາຄົມໂລກ. ຫຼັກການປະເທດຈີນດຽວກ່ຽວພັນເຖິງຜົນປະໂຫຍດໃຈກາງຂອງຈີນແລະຄວາມຮູ້ສຶກຂອງປະຊາຊົນຈີນ 1 ຕື້ 300 ລ້ານກວ່າຄົນ, ເຊິ່ງແມ່ນເງື່ອນໄຂເບື້ອງຕົ້ນແລະພື້ນຖານການເມືອງທີ່ຈີນຮັກສາການພົວພັນຮ່ວມມືມິດຕະພາບກັບປະເທດຕ່າງໆໃນໂລກ.