ກອງປະຊຸມເວທີປຶກສາຫາລືຮ່ວມມືເສດຖະກິດອ່າວເປີຍປູ້ຄັ້ງທີ 10 ແລະເວທີປຶກສາຫາລືພັດທະນາແລວທາງເສດຖະກິດຈີນແລະແຫຼມອິນໂດຈີນຄັ້ງທີ 2 ໄດ້ຈັດຂຶ້ນຢູ່ນະຄອນນານນິງເຂດກວາງຊີ ສປ ຈີນໃນວັນທີ 24 ພຶດສະພານີ້. ຜູ້ເຂົ້າຮ່ວມ 500 ກວ່າທ່ານໄດ້ຄົ້ນຄວ້າປຶກສາຫາລືກ່ຽວກັບຫົວຂໍ້ "ສ້າງຊອງທາງການຄ້າສາກົນທາງບົກແລະທາງທະເລໃໝ່, ຮ່ວມກັນສ້າງປະຊາຄົມຮ່ວມຊາຕາກຳຈີນ-ອາຊຽນ".
ທ່ານມາປ່ຽວ ຮອງປະທານສະພາປຶກສາການເມືອງປະຊາຊົນແຫ່ງຊາດຈີນກ່າວໃນພິທີໄຂກອງປະຊຸມວ່າ, ເລີ່ມແຕ່ເວທີປຶກສາຫາລືຮ່ວມມືເສດຖະກິດອ່າວເປີຍປູ້ສ້າງຕັ້ງຂຶ້ນເມື່ອປີ 2006 ມານີ້, ໄດ້ຍຶດໝັ້ນອຸດົມການທີ່ຊຸກຍູ້ການພັດທະນາແລະຮ່ວມມືຂອງພາກພື້ນອ່າວເປີຍປູ້, ຍຶດໝັ້ນຫຼັກການ "ທ່າແຮງຊວຍຊູຍູ້ໜູນກັນ, ການຮ່ວມມືຕ່າງຝ່າຍຕ່າງມີຜົນປະໂຫຍດແລະພັດທະນາຈະເລີນຮຸ່ງເຮືອງຮ່ວມກັນ", ຕັ້ງໜ້າຊຸກຍູ້ໃຫ້ການຮ່ວມມືພາກພື້ນອ່າວເປີຍປູ້ຈາກຂໍ້ລິເລີ່ມກ້າວໄປສູ່ການປະຕິບັດຕົວຈິງ, ຈາກຄວາມເປັນເອກະພາບກ້າວໄປສູ່ການປະຕິບັດຕົວຈິງ, ຈາກການຮ່ວມມືກ້າວໄປສູ່ຕ່າງຝ່າຍຕ່າງມີຜົນປະໂຫຍດ, ໄດ້ຮັບໝາກຜົນອຸດົມສົມບູນ, ສ້າງຜົນປະໂຫຍດໃຫ້ແກ່ປະຊາຊົນຂອງປະເທດຕ່າງໆໃນພາກພື້ນ, ກາຍເປັນການຮ່ວມມືອະນຸພາກພື້ນສຳຄັນພາຍໃຕ້ຂອບການຮ່ວມມືຮອບດ້ານຈີນ-ອາຊຽນ, ແລະກາຍເປັນໜຶ່ງໃນການພົວພັນທີ່ມີພະລັງຊີວິດທີ່ສຸດ, ມີເນື້ອໃນອຸດົມສົມບູນທີ່ສຸດແລະມີໝາກຜົນຫຼາຍທີ່ສຸດລະຫວ່າງຈີນແລະອາຊຽນ.
 |
