ຕອນເຊົ້າວັນທີ 24 ພຶດສະພານີ້ ຢູ່ຫໍສະພາປະຊາຊົນນະຄອນຫຼວງປັກກິ່ງ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນ ໄດ້ພົບປະເຈລະຈາກັບທ່ານນາງ ແອງເຈີລາ ເມີແຄວ ນາຍົກລັດຖະມົນຕີເຢຍລະມັນ. ຫຼັງການພົບປະ, ສອງຝ່າຍໄດ້ຮ່ວມກັນພົບປະກັບນັກຂ່າວ ໂດຍໄດ້ຕີລາຄາຢ່າງຕັ້ງໜ້າຕໍ່ການພົບປະເຈລະຈາ, ສອງຝ່າຍເຫັນດີແລະປຶກສາຕົກລົງວ່າ, ຈະສືບຕໍ່ຮັກສາການໄປມາຫາສູ່ກັນລະຫວ່າງການນຳຂັ້ນສູງແລະການປຶກສາຫາລືແບບກົນໄກ, ເປີດກວ້າງການຮ່ວມມືແບບຕ່າງຝ່າຍຕ່າງມີຜົນປະໂຫຍດທີ່ຫັນໜ້າໄປສູ່ອະນາຄົດ, ເປີດປະຕູເຊິ່ງກັນລະກັນໃຫ້ກວ້າງອອກ ແລະຊຸກຍູ້ສາຍພົວພັນຈີນ-ເຢຍລະມັນໃຫ້ຂຶ້ນສູ່ລະດັບໃໝ່.
ໃນເວລາຕອບຄຳຖາມກ່ຽວກັບການຮ່ວມມືຈີນ-ປະເທດເອີຣົບກາງເອີຣົບຕາເວັນອອກ ຫຼື 16+1, ທ່ານ ຫຼີເຄີ້ສຽງ ກ່າວວ່າ, ການຮ່ວມມື 16+1 ມີຜົນດີຕໍ່ການຊຸກຍູ້ການພັດທະນາຮ່ວມກັນຂອງຈີນແລະປະເທດເອີຣົບກາງເອີຣົບຕາເວັນອອກ, ຫຼຸດຜ່ອນຄວາມຜິດໂຕນກັນພາຍໃນສະຫະພາບເອີຣົບ, ບັນລຸການພັດທະນາຢ່າງກ້ຳເກິ່ງກັນແລະຂະບວນການເຊື່ອມໂຍງເຂົ້າກັນຂອງເອີຣົບ. ຍາມໃດ ຈີນກໍສະໜັບສະໜູນເອີຣົບເຊື່ອມໂຍງເຂົ້າເປັນເອກະພົບດຽວຢ່າງເດັດດ່ຽວ.
ທ່ານນາງ ເມີແຄວ ກ່າວວ່າ, ການຮ່ວມມື 16+1 ແມ່ນເວທີການຮ່ວມມືທີ່ມີຜົນປະໂຫຍດຕໍ່ການຊຸກຍູ້ການສ້າງພື້ນຖານໂຄງລ່າງຂອງປະເທດເອີລົບກາງແລະເອີຣົບຕາເວັນອອກ, ເຊິ່ງປະເທດເຫຼົ່ານີ້ແລະຈີນຕ່າງກໍມີທ່າແຮງທີ່ສາມາດຊ່ວຍຊູຍູ້ໜູນກັນໄດ້, ການດຳເນີນການຮ່ວມມືເປັນການເພີ່ມຕື່ມທີ່ມີຜົນດີຕໍ່ການສ້າງສາພາຍໃນສະຫະພາບເອີຣົບ, ຫາກບໍ່ແມ່ນການແບ່ງແຍກສະຫະພາບເອີຣົບ. ປະເທດສ່ວນຫຼາຍໃນການຮ່ວມມື 16+1 ແມ່ນສະມາຊິກສະຫະພາບເອີຣົບ, ເຢຍລະມັນເຫັນດີໃຫ້ການຮ່ວມມືທີ່ກ່ຽວຂ້ອງປະຕິບັດຕາມກົດໝາຍຂໍ້ກຳນົດຂອງສະຫະພາບເອີຣົບ ແລະບັນລຸຕ່າງຝ່າຍຕ່າງໄດ້ຮັບຜົນປະໂຫຍດ.
 |
