ວັນທີ 25 ພຶດສະພານີ້, ຢູ່ນະຄອນຫຼວງປັກກິ່ງ, ທ່ານສີຈີ້ນພິງ ປະທານປະເທດຈີນໄດ້ພົບປະທ່ານຟຣັງຊົວ ອໍລອງ ອະດີດປະທານາທິບໍດີຝຣັ່ງແລະກ່າວວ່າ, ຕົນມີຄວາມໝັ້ນໃຈຕໍ່ອະນາຄົດຂອງການພົວພັນລະຫວ່າງຈີນ-ຝຣັ່ງ, ຈີນຍິດີເພີ່ມທະວີການປະສານງານທາງຍຸດທະສາດກັບຝຣັ່ງແລະຮ່ວມມືກັນເພື່ອຮັບມືກັບສິ່ງທ້າທາຍຕ່າງໆທີ່ມີຕໍ່ທົ່ວໂລກ.
ທ່ານສີຈີ້ນຜິງໄດ້ສະແດງຄວາມຊົມເຊີຍຕໍ່ທ່ານອໍລອງທີ່ໄດ້ປະກອບສ່ວນເຂົ້າໃນການຊຸກຍູ້ການພົວພັນລະຫວ່າງຈີນກັບຝຣັ່ງແລະເພີ່ມທະວີການຮ່ວມມືລະຫວ່າງສອງປະເທດໃນວຽກງານສາກົນໃນໄລຍະທີ່ດຳລົງຕຳແໜ່ງປະທານາທິບໍດີຝຣັ່ງ. ທ່ານສີຈີ້ນຜິງຊີ້ໃຫ້ເຫັນວ່າ, ເດືອນມັງກອນປີນີ້, ທ່ານແອມມານູແອນ ມາຄຣົງ ປະທານາທິບໍດີຝຣັ່ງໄດ້ຢ້ຽມຢາມຈີນທາງລັດຖະກິດເປັນເທື່ອທຳອິດ,ແລະສອງຝ່າຍກໍບັນລຸຄວາມຮັບຮູ້ທີ່ເປັນເອກະພາບກັນອັນກວ້າງຂວາງກ່ຽວກັບເປີດກວ້າງການຮ່ວມມືໃນຂົງເຂດສອງຝ່າຍແລະຫຼາຍຝ່າຍ. ນອກນີ້, ຈີນກໍຍິນດີສຸມໃສ່ເພີ່ມທະວີການຮ່ວມມືກັບສະຫະພາບເອີລົບອີກດ້ວຍ.
ທ່ານອໍລອງໄດ້ຕີລາຄາສູງຕໍ່ບົດບາດອັນຕັ້ງໜ້າຂອງຈີນໃນວຽກງານສາກົນພາຍໃຕ້ການນຳພາຂອງທ່ານປະທານສີຈີ້ນຜິງ, ໂດຍສະເພາະໄດ້ປະກອບສ່ວນທີ່ສຳຄັນເພື່ອໃຫ້ບັນລຸການເຊັນສັນຍາປາຣີກ່ຽວກັບການປ່ຽນແປງດິນຟ້າອາກາດ. ທ່ານກ່າວຕື່ມວ່າ, ຕົນດີໃຈຫຼາຍທີ່ໄດ້ເຫັນວ່າພາຍໃຕ້ສະພາບການໃນປັດຈຸບັນ, ທ່ວງທ່າການຮ່ວມມືທາງຍຸດທະສາດລະຫວ່າງຝຣັ່ງກັບຈີນໄດ້ຮັບການປັບປຸງແລະຂະຫຍາຍຕົວ, ເຊິ່ງເປັນຜົນດີຕໍ່ການຮັກສາລັດທິຫຼາຍຝ່າຍແລະມີຜົນດີຕໍ່ແກ້ໄຂບັນຫາສາກົນແລະພາກພື້ນໂດຍຜ່ານການສົນທະນາແລະຮ່ວມມື.
