ວັນທີ 25 ພຶດສະພານີ້, ລັດຖະສະພາອິນໂດເນເຊຍໄດ້ຮັບຮອງເອົາກົດໝາຍວ່າດ້ວຍການຕ້ານການກໍ່ການຮ້າຍສະບັບປັບປຸງ, ໂດຍໃຫ້ເຈົ້າໜ້າທີ່ຕຳຫຼວດອິນໂດເນເຊຍມີອຳນາດໃຫຍ່ກວ່າເກົ່າໃນການປາບປາມລັດທິການກໍ່ການຮ້າຍ.
ກົດໝາຍສະບັບປັບປຸງທີ່ຮັບຮອງເທື່ອນີ້ຈະອະນຸມັດໃຫ້ຕຳຫຼວດອິນໂດເນເຊຍນຳໃຊ້ການເຄື່ອນໄຫວທີ່ປາບປາມຜູ້ຕ້ອງສົງໄສກໍ່ການຮ້າຍແບບລົງມືກ່ອນ, ແກ່ຍາວເວລາກັກຂັງຜູ້ຕ້ອງສົງໄສ, ແລະອະນຸມັດໃຫ້ກອງທັບແຫ່ງຊາດອິນໂດເນເຊຍເຂົ້າຮ່ວມການເຄື່ອນໄຫວຕ້ານການກໍ່ການຮ້າຍ.
ກາງເດືອນພຶດສະພານີ້, ຢູ່ຊູຣາບາຢາ ເທສະບານແຂວງຈາວາຕາເວັນອອກຂອງອິນໂດເນເຊຍໄດ້ເກີດເຫດການໂຈມຕີດ້ວຍລູກລະເບີດແບບສະຫຼະຊີບຫຼາຍເທື່ອ, ສົ່ງຜົນເຮັດໃຫ້ 20 ກວ່າຄົນເສຍຊີວິດ, 10 ກວ່າຄົນໄດ້ຮັບບາດເຈັບ. ຫຼັງເກີດເຫດ, ທ່ານໂຈໂຄ ວີໂດໂດ ປະທານາທິບໍດີອິນໂດເນເຊຍໄດ້ເດີນທາງໄປຊູຣາບາຢາເພື່ອສະແດງຄວາມເຫັນໃຈຕໍ່ຜູ້ຖືກທຳຮ້າຍແລະຄອບຄົວຂອງເຂົາ, ແລະກ່າວວ່າຫຼັກໝັ້ນຂອງອິນໂດເນເຊຍໃນການໂຈມຕີລັດທິການກໍ່ການຮ້າຍບໍ່ມີການປະນີປະນອມແຕ່ຢ່າງໃດ, ທັງຮຽກຮ້ອງໃຫ້ລັດຖະສະພາອິນໂດເນເຊຍຮັບຮອງເອົາກົດໝາຍວ່າດ້ວຍຕ້ານການກໍ່ການຮ້າຍສະບັບປັບປຸງທີ່ລັດຖະບານຍື່ນສະເໜີ ໃນປີ 2016.
