ຕາມຂ່າວCRI: ວັນທີ 24 ພຶດສະພານີ້ຕາມເວລາທ້ອງຖິ່ນ, ທ່ານວຼາດີເມຍ ປູດິນ, ປະທານາທິບໍດີຣັດເຊຍໄດ້ຕ້ອນຮັບການເຂົ້າຢ້ຽມຄຳນັບຂອງທ່ານວາງ ຊີ ຊ່ານ, ຮອງປະທານປະເທດຈີນຢູ່ນະຄອນແຊງເປແຕສະບວກ.
ທ່ານວຼາດີເມຍ ປູດິນໄດ້ຝາກຄວາມຢື້ຢາມຖາມຂ່າວຢ່າງສະໜິດສະໜົມແລະຄວາມອວຍພອນຢ່າງດີງາມໄປຍັງທ່ານປະທານສີ ຈິ້ນ ຜີງ ໂດຍຜ່ານທ່ານວາງ ຊີ ຊ່ານ, ແລະກ່າວຄວາມເຊື່ອວ່າໃນການສ້າງສາປະເທດຈະໄດ້ຮັບຜົນສຳເລັດໃໝ່ຢ່າງແນ່ນອນໂດຍມີທ່ານສີ ຈິ້ນ ຜີງ, ປະທານປະເທດຈີນນຳພາປະຊາຊົນຈີນ. ທ່ານວຼາດີເມຍ ປູດິນຫວັງວ່າຈະເດີນທາງໄປຢ້ຽມຢາມຈີນອີກເທື່ອໜຶ່ງແລະພົບປະກັບທ່ານສີຈິ້ນຜີງ. ທ່ານກ່າວວ່າ, ຣັດເຊຍຍິນດີຮ່ວມກັບຈີນ, ລົງເລິກການຮ່ວມມືຮອບດ້ານຕື່ມອີກ, ເພີ່ມທະວີຄວາມເຂົ້າໃຈກັນແລະການສະໜັບສະໜູນກັນແລະກັນໃນວຽກງານສາກົນ, ເຮັດໃຫ້ການພົວພັນຄູ່ປະສານງານຍຸດທະສາດຮອບດ້ານລະຫວ່າງຣັດເຊຍ-ຈີນກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ.
ໃນວັນທີ 25 ພຶດສະພານີ້ຕາມເວລາທ້ອງຖິ່ນ, ທ່ານວາງ ຊີ ຊ່ານໄດ້ເຂົ້າຮ່ວມເວທີປຶກສາຫາລືດ້ານເສດຖະກິດສາກົນແຊງເປແຕສະບວກຄັ້ງທີ 22. ເວທີປຶກສາຫາລືຄັ້ງນີ້ເນັ້ນຫົວຂໍ້ "ການສ້າງສາເສດຖະກິດທີ່ມີຄວາມໄວ້ເນື່ອງເຊື່ອໃຈກັນ", ທ່ານວາງ ຊີ ຊ່ານໄດ້ກ່າວປາຖະກະຖາທີ່ມີຫົວຂໍ້ວ່າ "ເພີ່ມຄວາມໄວ້ເນື້ອເຊື່ອໃຈກັນ, ພັດທະນາຮ່ວມມືກັນ".
 |
