ອັຟການິສະຖານສາມາດຈັບກຸມຜູ້ຄ້າຢາເສບຕິດໄດ້ 700 ກວ່າຄົນໃນໄລຍະ 2 ເດືອນຜ່ານມາ

ເຈົ້າໜ້າທີ່ກະຊວງພາຍໃນອັຟການິສະຖານໄດ້ຢືນຢັນຕໍ່ສື່ມວນຊົນເມື່ອມໍ່ໆນີ້ວ່າ: ໃນການເຄື່ອນໄຫວປາບປາມຢາເສບຕິດໃນໄລຍະ 2 ເດືອນຜ່ານມາ, ເຈົ້າໜ້າທີ່ຕຳຫຼວດອັຟການິສະຖານສາມາດຈັບກຸມຜູ້ຄ້າຢາເສບຕິດໄດ້ຢ່າງໜ້ອຍ 700 ຄົນໃນຂອບເຂດທົ່ວປະເທດ ທັງຍຶດໄດ້ຢາເສບຕິດໄດ້ຈຳນວນຫຼວງຫຼາຍ ຖືວ່າໄດ້ຮັບຜົນງານພົ້ນເດັ່ນໃນການປາບປາມຢາເສບຕິດຄັ້ງນີ້.

ເຈົ້າໜ້າທີ່ກະຊວງພາຍໃນອັຟການິສະຖານຖະແຫຼງວ່າ: ໃນໄລຍະ 2 ເດືອນຜ່ານມາ, ເຈົ້າໜ້າທີ່ຕຳຫຼວດໄດ້ປະຕິບັດການເຄື່ອນໄຫວປາບປາມຢາເສບຕິດພາຍໃນຂອບເຂດທົ່ວປະເທດຫຼາຍກວ່າ 600 ເທື່ອ ແລະສາມາດຍຶດຢາເສບຕິດຊະນິດຕ່າງໆໄດ້ປະມານ 68 ໂຕນ.

ຫ້ອງການບັນຫາຢາເສບຕິດແລະອາຊະຍາກຳອົງການສະຫະປະຊາຊາດໄດ້ເປີດເຜີຍບົດລາຍງານໃນໄລຍະມໍ່ໆມານີ້ວ່າ, ການຄ້າຢາເສບຕິດເປັນແຫຼ່ງລາຍຮັບສຳຄັນຂອງກຸ່ມປະກອບອາວຸດຕໍ່ຕ້ານລັດຖະບານເຊິ່ງລວມທັງກຸ່ມຕາລີບັນ, ເຊິ່ງກາຍເປັນໄພຂົ່ມຂູ່ຕໍ່ຄວາມໝັ້ນຄົງຂອງລັດຖະບານອັຟການິສະຖານກໍຄືປະເທດອື່ນໆໃນພາກພື້ນ.