ວັນທີ 27 ພຶດສະພານີ້, ທ່ານລູ້ຄ່າງ ໂຄສົກກະຊວງການຕ່າງປະເທດຈີນຕອບຄຳຖາມຂອງນັກຂ່າວກ່ຽວກັບກຳປັ່ນຮົບອາເມລິກາລ່ວງເຂົ້ານ່ານທະເລໝູ່ເກາະຊີຊາຂອງຈີນ ໂດຍກ່າວວ່າ, ວັນທີ 27 ພຶດສະພານີ້, ກຳປັ່ນຮົບ "ຮີກິນສ໌" ແລະ "ອັນເຕຍຕຳ" ຂອງອາເມລິກາໄດ້ລ່ວງເຂົ້ານ່ານທະເລໝູ່ເກາະຊີຊາຂອງຈີນ ໂດຍບໍ່ໄດ້ຮັບການອະນຸຍາດຈາກລັດຖະບານ. ກອງທັບເຮືອຈີນໄດ້ກວດກາ ແລະ ຈຳແນກຖານະຂອງກຳປັ່ນຮົບດັ່ງກ່າວ ພ້ອມທັງກ່າວເຕືອນ ແລະ ຂັບໄລ່.
ທ່ານລູ້ຄ່າງກ່າວວ່າ, ອາເມລິກາໄດ້ສົ່ງກຳປັ່ນຮົບລ່ວງເຂົ້ານ່ານທະເລໝູ່ເກາະຊີຊາຂອງຈີນອີກເທື່ອໜຶ່ງ, ໄດ້ລະເມີດກົດໝາຍຂອງຈີນ ແລະ ກົດໝາຍສາກົນທີ່ກ່ຽວຂ້ອງ, ໄດ້ລ່ວງລ້ຳອະທິປະໄຕຂອງຈີນຢ່າງຮ້າຍແຮງ, ທຳລາຍສັນຕິພາບ, ຄວາມໝັ້ນຄົງ ແລະ ລະບຽບການປົກກະຕິຂອງເຂດທະເລທີ່ກ່ຽວຂ້ອງ. ຈີນໄດ້ສະແດງຄວາມບໍ່ພໍໃຈຢ່າງຮຸນແຮງ ແລະ ຄັດຄ້ານຢ່າງເດັດດ່ຽວຕໍ່ການກະທຳທີ່ກ່ຽວຂ້ອງຂອງອາເມລິກາ, ໄດ້ທວງໃຫ້ອາເມລິກາຈົ່ງຢຸດຕິການກະທຳແບບທ້າທາຍທີ່ລ່ວງລະເມີດອະທິປະໄຕຂອງຈີນ ແລະ ເປັນໄພຂົ່ມຂູ່ຕໍ່ຄວາມໝັ້ນຄົງຂອງຈີນ. ຈີນຈະສືບຕໍ່ໃຊ້ມາດຕະການທຸກຢ່າງທີ່ຈຳເປັນ ເພື່ອປົກປັກຮັກສາອະທິປະໄຕ ແລະ ຄວາມໝັ້ນຄົງແຫ່ງຊາດຂອງຈີນ.