ໃນກອງປະຊຸມສະມາຊິກຄົບຄະນະຂອງອົງການແກ້ໄຂຂໍ້ຂັດແຍ້ງທີ່ຈັດຂຶ້ນໂດຍອົງການການຄ້າໂລກໃນວັນທີ 28 ພຶດສະພານີ້, ອາເມລິກາໄດ້ຕິຕຽນຈີນທີ່ບັງຄັບໃຫ້ວິສາຫະກິດສົ່ງອອກຂອງອາເມລິກາໂອນເຕັກນິກໃຫ້.
ຕໍ່ເລື່ອງນີ້, ທ່ານ ຈ່າງຊ້ຽງເຊີນ ຜູ້ຕາງໜ້າຖາວອນຂອງຈີນປະຈຳອົງການການຄ້າໂລກກ່າວວ່າ, ວິສາຫະກິດອາເມລິກາໂອນເຕັກນິກໃຫ້ຈີນນັ້ນແມ່ນການກະທຳທາງການຄ້າທີ່ປົກກະຕິ, ແມ່ນຜົນການຄັດເລືອກສອງຝ່າຍແລະຕັດສິນນະໂຍບາຍເປັນເຈົ້າຕົນເອງຂອງວິສາຫະກິດ, ສະນັ້ນ ບໍ່ຄວນຖືການຄ້າຂາຍທາງການຄ້າທີ່ປົກກະຕິເປັນການກະທຳແບບບັງຄັບໃນການຈັດຊື້ຂອງລັດຖະບານ.
ທ່ານ ຈ່າງຊ້ຽງເຊີນ ກ່າວຕື່ມວ່າ, ຄວາມກ້າວໜ້າແລະຜົນງານທີ່ຈີນໄດ້ຮັບໃນດ້ານຊັບສິນທາງປັນຍາ ບໍ່ແມ່ນອາໄສການບັງຄັບໃຫ້ໂອນເຕັກນິກ. ການເພີ່ມທະວີການປົກປ້ອງຊັບສິນທາງປັນຍາຕື່ມອີກ ບໍ່ພຽງແຕ່ແມ່ນຄວາມຕ້ອງການໃນການເປີດປະຕູສູ່ໂລກພາຍນອກໃຫ້ກວ້າງອອກເທົ່ານັ້ນ, ຍິ່ງແມ່ນຄວາມຕ້ອງການຂອງການພັດທະນາຕົນເອງຂອງຈີນນຳອີກ. ຊັບສິນທາງປັນຍາແລະເຕັກນິກຄວນກາຍເປັນຂົວຕໍ່ແຫ່ງການຮ່ວມມືດ້ານການປະດິດສ້າງໃໝ່ລະຫວ່າງປະເທດຕ່າງໆໃນໂລກ, ແຕ່ບໍ່ຄວນຖືກນຳໃຊ້ເປັນເຄື່ອງມືຂອງລັດທິປົກປ້ອງການຄ້າ, ຍິ່ງບໍ່ຄວນນຳໃຊ້ມາສະກັດກັ້ນການພັດທະນາຂອງປະເທດອື່ນ.
 |
