ເຈົ້າໜ້າທີ່ຈີນກ່າວວ່າ ມາດຕະການສ້າງຄວາມສະດວກໃຫ້ແກ່ການຂໍວີຊາລະຫວ່າງຈີນ-ອາເມລິກາເປັນເລື່ອງສະເໝີພາບແລະຕ່າງຝ່າຍຕ່າງມີຜົນປະໂຫຍດ
2018-05-31 11:30:13 cri
ໃນກອງປະຊຸມຖະແຫຼງຂ່າວຂອງກະຊວງການຕ່າງປະເທດຈີນທີ່ຈັດຂຶ້ນຕາມປົກກະຕິໃນວັນທີ 30 ພຶດສະພານີ້, ທ່ານນາງຮວ້າຊຸນຢິງ ໂຄສົກກະຊວງການຕ່າງປະເທດຈີນໄດ້ຕອບຄຳຖາມຂອງນັກຂ່າວກ່ຽວກັບການລາຍງານຂ່າວທີ່ວ່າ ອາເມລິກາມີແຜນຈະຈຳກັດອາຍຸການວີຊາຂອງນັກສຶກສາຈີນທີ່ຮຽນຢູ່ປະເທດຕົນ ໃນນີ້ລວມທັງນັກສຶກສາ ວິຊາຫຸ່ນຍົນ,ການບິນ ແລະການບິນອະວະກາດ, ອຸດສາຫະກຳໄຮເທັກແລະວິຊາອື່ນໆ. ທ່ານນາງຮວ້າຊົນຢິງກ່າວວ່າ: ດັ່ງທີ່ທຸກຄົນຮູ້ດີວ່າ ການໄປມາຫາສູ່ກັນລະຫວ່າງປະຊາຊົນເປັນພື້ນຖານສຳຄັນແຫ່ງການສົ່ງເສີມການແລກປ່ຽນແລະຮ່ວມມືລະຫວ່າງບັນດາປະເທດເຊິ່ງລວມທັງຈີນແລະອາເມລິກາ. ມາດຕະການສ້າງຄວາມສະດວກໃຫ້ແກ່ການຂໍວີຊາລະຫວ່າງຈີນ-ອາເມລິກາເປັນເລື່ອງທີ່ສະເໝີພາບແລະຕ່າງຝ່າຍຕ່າງມີຜົນປະໂຫຍດ ແລະສອດຄ່ອງກັບຜົນປະໂຫຍດຮ່ວມຂອງປະຊາຊົນສອງຊາດ. ຈີນເຫັນວ່າ ສອງຝ່າຍຈີນ-ອາເມລິກາລ້ວນແຕ່ຄວນໃຊ້ມາດຕະການທີ່ຕັ້ງໜ້າກວ່າເກົ່າເພື່ອເຮັດໃຫ້ການໄປມາຫາສູ່ກັນລະຫວ່າງປະຊາຊົນສອງຊາດມີຄວາມສະດວກຫຼາຍຂຶ້ນ, ເພື່ອສ້າງເງື່ອນໄຂທີ່ດີກວ່າເກົ່າໃຫ້ແກ່ການຮ່ວມມືໃນຂົງເຂດຕ່າງໆລະຫວ່າງສອງປະເທດ, ແຕ່ບໍ່ແມ່ນເຮັດແບບກົງກັນຂ້າມ.
