ທ່ານກົ່ງສຽວເຊິ່ງ ທູດພິເສດບັນຫາຕາເວັນອອກກາງຂອງຈີນທີ່ກຳລັງຢ້ຽມຢາມເອຢິບກ່າວເນັ້ນໃນວັນທີ 31 ພຶດສະພາຜ່ານມານີ້ວ່າ: ປາແລັສຕິນແລະອິສຣາແອນຄວນຢຸດຕິການປະທະກັນແບບນອງເລືອດໃນທັນທີ ແລະການເຈລະຈາແລະສົນທະນາທາງການເມືອງເປັນທາງອອກພຽງໜຶ່ງດຽວເທົ່ານັ້ນໃນການແກ້ໄຂບັນຫາປາແລັສຕິນ-ອິສຣາແອນ.
ທ່ານກົ່ງສຽວເຊິ່ງກ່າວຕື່ມວ່າ: ຈີນໃຫ້ຄວາມສົນໃຈຢ່າງສູງຕໍ່ສະພາບເຄັງຕຶງຂອງປາແລັສຕິນໃນປັດຈຸບັນ ແລະຈີນເຫັນວ່າ: ປະຊາຄົມໂລກຄວນສືບຕໍ່ຍຶດໝັ້ນ "ແຜນການສອງປະເທດ", ປະຕິບັດຕາມມະຕິກ່ຽວຂ້ອງຂອງອົງການສະຫະປະຊາຊາດແລະຄວາມເປັນເອກະພາບໃນສາກົນທີ່ມີຢູ່ແລ້ວເຊັ່ນວ່າ ຂໍ້ລິເລີ່ມສັນຕິພາບອາຣັບແລະອື່ນໆ ເພື່ອເສີມຂະຫຍາຍບົດບາດສ້າງສັນໃນການແກ້ໄຂບັນຫາປາແລັສຕິນດ້ວຍວິທີທາງການເມືອງ.
ທ່ານກົ່ງສຽວເຊິ່ງຢືນຢັນວ່າ ຈີນຕີລາຄາສູງຕໍ່ບົດບາດຂອງເອຢິບໃນການສົ່ງເສີມຂະບວນການສັນຕິພາບຕາເວັນອອກກາງ, ພ້ອມທັງຍິນດີຮັກສາການປະສານງານແລະຮ່ວມມືກັບເອຢິບແລະພະຍາຍາມຮ່ວມເພື່ອບັນລຸສັນຕິພາບຂອງຕາເວັນອອກກາງ.
 |
