ວັນທີ 31 ພຶດສະພາຜ່ານມານີ້ຢູ່ນະຄອນຫຼວງປັກກິ່ງ, ທ່ານກ່າວເຟີງ ໂຄສົກກະຊວງການຄ້າຈີນກ່າວວ່າ, ປັດຈຸບັນ, ວຽກງານກ່ຽວກັບບັນຊີລາຍການທາງລົບການລົງທຶນຈາກຕ່າງປະເທດຂອງຈີນພວມດຳເນີນຢ່າງຕັ້ງໜ້າ, ແລະຈະເປີດເຜີຍກ່ອນວັນທີ 30 ມິຖຸນານີ້.
ທ່ານກ່າວເຟີງ ກ່າວວ່າ, ໃນບັນຊີລາຍການທາງລົບສະບັບໃໝ່ນັ້ນ, ນອກຈາກມີມາດຕະການເປີດປະຕູສູ່ພາຍນອກໃນຂົງເຂດການເງິນແລະລົດທີ່ໄດ້ປະກາດໃນເມື່ອກ່ອນແລ້ວ, ຍັງຈະຍົກເລີກຫຼືຫຼຸດຄວາມຈຳກັດຕໍ່ທຶນພາຍນອກໃນຫຼາຍຂົງເຂດອື່ນເຊັ່ນ: ພະລັງງານ, ຊັບພະຍາກອນ, ພື້ນຖານໂຄງລ່າງ, ການຂົນສົ່ງແລະຄົມມະນາຄົມ, ການຈໍລະຈອນສິນຄ້າ, ການບໍລິການວິຊາຊີບແລະອື່ນໆ.
ທ່ານກ່າວເຟີງກ່າວຕື່ມວ່າ, ບັນຊີລາຍການທາງລົບສະບັບໃໝ່ຈະເປີດເຜີຍມາດຕະການເປີດປະຕູສູ່ພາຍນອກໃນຫຼາຍປີຕໍ່ໜ້າດ້ວຍວິທີທີ່ກຳນົດໄລຍະຂ້າມຜ່ານໃຫ້ແກ່ຂະແໜງການທີ່ກ່ຽວຂ້ອງ.
 |
