ຈີນໄດ້ຕອບຮັບຕໍ່ອິນເດຍ ແລະປາກິສະຖານທີ່ຍີນດີປະຕິບັດຕາມສັນຍາຢຸດຍິງປີ 2003

ວັນທີ 31 ພຶດສະພານີ້, ທ່ານນາງຮ້ວາຊຸ່ນຢີງ ໂຄສົກກະຊວງການຕ່າງປະເທດຈີນໄດ້ຕອບຮັບໃນກອງປະຊຸມຖະແຫຼງຂ່າວຢູ່ນະຄອນຫຼວງປັກກິ່ງທີ່ອິນເດຍ ແລະປາກິສະຖານຍີນດີປະຕິບັດຕາມສັນຍາຢຸດຍິງທີ່ໄດ້ເຊັນໃນປີ 2003 .
ມີນັກຂ່າວຖາມວ່າ: ວັນທີ 29 ພຶດສະພາຜ່ານມານີ້, ອິນເດຍ ແລະປາກິສະຖານໄດ້ບັນລຸຄວາມເຫັນເປັນເອກະພາບກັນໂດຍຍີນດີປະຕິບັດຕາມສັນຍາຢຸດຍິງທີ່ໄດ້ເຊັນກັນໃນປີ 2003 ເພື່ອຮັກສາສັນຕິພາບຢູ່ເຂດແຄສເມຍ. ຜູ້ສັນທັດກໍລະນີກ່າວວ່າ: ລັດຖະບານສອງປະເທດໄດ້ເຫັນເປັນເອກະພາບກັນວ່າຖ້າມີບັນຫາໃດໆເກີດຂຶ້ນກໍສາມາດແກ້ໄຂໄດ້ໂດຍຜ່ານໂທລະສັບສາຍດ່ວນ ຫຼື ຈັດກອງປະຊຸມຢູ່ເຂດຊາຍແດນ. ຕໍ່ເລື່ອງນີ້ຝ່າຍຈີນມີຄວາມເຫັນແນວໃດ?
ທ່ານນາງຮ້ວາຊຸ່ນຢີງກ່າວວ່າ: ຈີນຊົມເຊີຍການກະທຳຢ່າງຕັ້ງໜ້າຂອງອິນເດຍ ແລະປາກິສະຖານ ແລະຫວັງວ່າສອງຝ່າຍຈະສາມາດສືບຕໍ່ແກ້ໄຂບັນຫາທີ່ກ່ຽວຂ້ອງໄດ້ໂດຍຜ່ານໂທລະສັບສາຍດ່ວນ ແລະການເຈລະຈາເປັນຢ່າງດີ ເພື່ອຮັກສາສັນຕິພາບ ແລະຄວາມໝັ້ນຄົງຂອງພາກພື້ນ.