ກະຊວງການຄ້າຈີນເປີດເຜີຍໃນວັນທີ 1 ມິຖຸນານີ້ວ່າ, ຍອດມູນຄ່າການຄ້າລະຫວ່າງຈີນແລະ 16 ປະເທດເອີລົບກາງແລະຕາເວັນອອກໃນປີ 2017 ບັບລຸເຖິງ 67 ຕື້ 980 ລ້ານໂດລາສະຫະລັດ, ທຽບໃສ່ໄລຍະດຽວກັນຂອງປີ 2016 ເພີ່ມຂຶ້ນ 15,9%.
ໃນກອງປະຊຸມຖະແຫຼງຂ່າວຂອງກອງປະຊຸມລະດັບລັດຖະມົນຕີຈີນ-ປະເທດເອີລົບກາງແລະຕາເວັນອອກເພື່ອຊຸກຍູ້ເສດຖະກິດການຄ້າຄັ້ງທີ 3 ແລະງານວາງສະແດງສິນຄ້າການລົງທຶນຈີນ-ປະເທດເອີລົບກາງແລະຕາເວັນອອກຄັ້ງທີ 4 ທີ່ຈັດຂຶ້ນໃນວັນທີ 1 ມິຖຸນານີ້, ທ່ານຢີຢວນຖັງ ຮອງຫົວໜ້າກົມເອີລົບກະຊວງການຄ້າຈີນກ່າວວ່າ, ການຄ້າສອງຝ່າຍລະຫວ່າງຈີນແລະ 16 ປະເທດເອີລົບກາງແລະຕາເວັນອອກລ້ວນແຕ່ໄດ້ຮັກສາທ່າອຽງເຕີບໂຕທີ່ດີ, ການລົງທຶນເຊິ່ງກັນແລະກັນຂອງສອງຝ່າຍໄດ້ເພີ່ມຂຶ້ນຢ່າງບໍ່ຢຸດຢັ້ງ, ແລະຂົງເຂດການລົງທຶນກໍໄດ້ນັບມື້ນັບຫຼາຍຂຶ້ນ.
ທ່ານຢີຢວນຖັງ ກ່າວຕື່ມວ່າ, ກະຊວງການຄ້າຈີນຈະຈັດກອງປະຊຸມລະດັບລັດຖະມົນຕີຈີນ-ປະເທດເອີລົບກາງແລະຕາເວັນອອກເພື່ອຊຸກຍູ້ເສດຖະກິດການຄ້າຄັ້ງທີ 3 ຢູ່ນະຄອນນິງໂປ່ ສປ ຈີນແຕ່ວັນທີ 6-7 ມິຖຸນານີ້, ແລະຈະຮ່ວມກັບອົງການປົກຄອງທ້ອງຖິ່ນແຂວງເຈີ້ຈ່ຽງຈັດງານວາງສະແດງສິນຄ້າການລົງທຶນຈີນ-ປະເທດເອີລົບກາງແລະຕາເວັນອອກຄັ້ງທີ 4 ແຕ່ວັນທີ 8-11ມິຖຸນານີ້.
 |
