ວັນທີ 1 ມິຖຸນານີ້, ທ່ານວາງຢີ້ ທີ່ປຶກສາຫາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ກ່າວຢູ່ບຣຸກແຊນວ່າ: ຫວັງວ່າຄູ່ຮ່ວມມືຂອງພວກເຮົາຈະປະຕິບັດຕາມຄຳໝັ້ນສັນຍາຂອງຕົນ.
ໃນເວລາຕອບຄຳຖາມຂອງນັກຂ່າວຮ່ວມກັບທ່ານນາງ ແຟເດີຣິກາ ໂມເກຣີນີ ຜູ້ຕາງໜ້າລະດັບສູງນະໂຍບາຍການຕ່າງປະເທດ ແລະຄວາມໝັ້ນຄົງສະຫະພາບເອີຣົບ, ທ່ານວາງຢີ້ໄດ້ກ່າວວ່າ: ດ້ານບັນຫາຂໍ້ຂັດແຍ້ງດ້ານເສດຖະກິດ-ການຄ້າຈີນ-ອາເມລິກາ, ຫຼັກໝັ້ນຂອງຈີນແມ່ນບໍ່ພຽງແຕ່ ເພື່ອຮັກສາຜົນປະໂຫຍດທີ່ຊອບທຳຂອງຕົນເທົ່ານັ້ນ, ຍັງເພື່ອຮັກສາກະຕິກາສາກົນ ແລະລະບົບການຄ້າຫຼາຍຝ່າຍອີກດ້ວຍ. ຈີນຍິນດີຖືເອົານ້ຳໃຈເຄົາລົບນັບຖືເຊັ່ງກັນ ແລະກັນ, ມີຄວາມສະເໝີພາບ ແລະໃຫ້ຕ່າງຝ່າຍຕ່າງມີຜົນປະໂຫຍດ, ປຶກສາຫາລືຢ່າງເລິກເຊິ່ງ ແລະລະອຽດກວ່າເກົ່າກັບອາເມລິກາກ່ຽວກັບຈະຈັດຕັ້ງປະຕິບັດຄວາມເຫັນເປັນເອກະພາບກັນທີ່ບັນລຸໄດ້ໃນເມື່ອກ່ອນເປັນແນວໃດ, ຈີນມີຄວາມຫວັງ ແລະຄວາມເຊື່ອໝັ້ນວ່າຈະສາມາດບັນລຸໝາກຜົນແຫ່ງການຮ່ວມມື ແລະຕ່າງຝ່າຍຕ່າງມີຜົນປະໂຫຍດໄດ້ໃນສຸດທ້າຍ. ຈີນແມ່ນປະເທດທີ່ມີຄວາມຮັບຜິດຊອບ, ແລະຍາມໃດກໍປະຕິບັດຕາມຄຳໝັ້ນສັນຍາຂອງຕົນໃນການໄປມາຫາສູ່ກັນລະຫວ່າງຊາດ, ສະນັ້ນ, ຈີນຫວັງວ່າຄູ່ຮ່ວມມືຂອງພວກເຮົາກໍຈະເຮັດໄດ້ເຊັ່ນດຽວກັນ.
 |
