ໃນກອງປະຊຸມສົນທະນາແຊງກລີລາລາຄັ້ງທີ 17 ທີ່ຈັດຂຶ້ນໃນວັນທີ 2 ມິຖຸນານີ້, ທ່ານ ເຫີເລີຍ, ຫົວໜ້າຄະນະຜູ້ແທນຈີນ, ຮອງຫົວໜ້າສະຖາບັນວິທະຍາສາດການທະຫານຂອງກອງທັບປົດປ່ອຍປະຊາຊົນຈີນກ່າວວ່າ, ຫວັງວ່າຈີນແລະອາເມລິກາເພີ່ມທະວີການຮ່ວມມື,ຍົກລະດັບການພົວພັນລະຫວ່າງສອງປະເທດ-ສອງກອງທັບໃຫ້ສູງຂຶ້ນ,ປະກອບສ່ວນເຂົ້າໃນສັນຕິພາບແລະສະຖຽນລະພາບຂອງພາກພື້ນກໍ່ຄືຂອງໂລກ.
ທ່ານ ເຫີເລີຍ ກ່າວວ່າ, ການພົວພັນລະຫວ່າງກອງທັບຈີນແລະອາເມລິກາແມ່ນພາກສ່ວນປະກອບທີ່ສຳຄັນຂອງການພົວພັນລະຫວ່າງສອງປະເທດ, ບົນພື້ນຖານການຂະຫຍາຍສາຍພົວພັນລະຫວ່າງສອງປະເທ, ການພົວພັນລະຫວ່າງສອງກອງທັບຈີນ-ອາເມລິກາກໍ່ໄດ້ຂະຫຍາຍຕົວໄປໜ້າຢ່າງບໍ່ຢຸດຢັ້ງ.
ໃນມື້ດັ່ງກ່າວ, ທ່ານ ແຈັມສ໌ ມັດຕິສ໌ ລັດຖະມົນຕີກະຊວງປ້ອງກັນປະເທດອາເມລິກາກ່າວໃນກອງປະຊຸມສົນທະນາແຊງກລີລາວ່າ, ອາເມລິກາຈະສືບຕໍ່ສະແຫວງຫາການສ້າງການພົວພັນທີ່ມີລັກສະນະສ້າງສັນແລະບັງເກີດຜົນກັບຈີນ,ດຳເນີນການຮ່ວມມືຕາມຄວາມສາມາດຂອງຕົນ. ທ່ານຈະຢ້ຽມຢາມຈີນຕາມຄຳເຊີນໃນໄລຍະໄວໆນີ້ ເພື່ອສະແຫວງຫາການເປີດກວ້າງແລະລົງເລິກການສົນທະນາລະຫວ່າງສອງປະເທດ.
ທ່ານ ເຫີເລີຍ ກ່າວຕື່ມວ່າ, ກອງທັບຈີນຍິນດີຕ້ອນຮັບທ່ານ ແຈັມສ໌ ມັດຕິສ໌ ຢ້ຽມຢາມຈີນຕາມແຜນການ. ຈີນຫວັງວ່າກອງທັບຂອງສອງປະເທດເລີ່ມຈາກສະພາບການລວມທີ່ປົກປັກຮັກສາສັນຕິພາບຂອງໂລກແລະຂອງພາກພື້ນ,ຍຶດໝັ້ນຫຼັກການທີ່ບໍ່ປະທະກັນ,ບໍ່ເປັນປໍລະປັກກັນ,ເຄົາລົບເຊິ່ງກັນແລະກັນ ແລະ ການຮ່ວມມືແບບຕ່າງຝ່າຍຕ່າງມີຜົນປະໂຫຍດ,ຍົກການພົວພັນລະຫວ່າງສອງປະເທດ-ສອງກອງທັບໃຫ້ກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ,ປະກອບສ່ວນເຂົ້າໃນສັນຕິພາບແລະສະຖຽນລະພາບຂອງພາກພື້ນກໍ່ຄືຂອງໂລກ.
 |
