ວັນທີ 2 ມິຖຸນານີ້, ໃນເວລາຕອບຄຳຖາມຂອງນັກຂ່າວກ່ຽວກັບຄວາມຄືບໜ້າການກະກຽມຫຼ້າສຸດກ່ຽວກັບການພົບປະກັນລະຫວ່າງຜູ້ນຳສປປເກົາຫຼີ ກັບ ອາເມລິກາ, ທ່ານນາງຮວ້າຊຸ່ນອີ໋ງ ໂຄສົກກະຊວງການຕ່າງປະເທດຈີນກ່າວວ່າ, ຈີນຫວັງວ່າ ແລະ ສະໜັບສະໜູນສປປເກົາຫຼີແລະອາເມລິກາສືບຕໍ່ກ້າວໄປໜ້າພ້ອມກັນ ສະແດງຄວາມຈິງໃຈເຊິ່ງກັນແລະກັນ, ຕັ້ງໜ້າຊຸກຍູ້ວຽກງານກະກຽມການພົບປະກັນລະຫວ່າງຜູ້ນຳສອງຝ່າຍ.
ມີນັກຂ່າວຖາມວ່າ, ທ່ານໂດນາດ ທຣຳ ປະທານາທິບໍດີອາເມລິກາໄດ້ພົບປະທ່ານກິມເຢງໂຊ ຮອງປະທານຄະນະກຳມະການສູນກາງພັກແຮງງານເກົາຫຼີຢູ່ທຳນຽບຂາວໃນ ຕອນບ່າຍວັນທີ 1 ມິຖຸນານີ້, ຫຼັງຈາກການພົບປະ, ທ່ານທຣຳປະກາດວ່າຕົກລົງແລ້ວທີ່ຈະຈັດການພົບປະລະຫວ່າງຜູ້ນຳອາເມລິກາ-ສປປເກົາຫຼີຢູ່ສິງກະໂປໃນວັນທີ 12 ມິຖຸນານີ້. ຈີນຕີລາຄາແນວໃດຕໍ່ເລື່ອງນີ້?
ທ່ານນາງຮວ້າຊຸ່ນອີ໋ງກ່າວວ່າ, ຈີນກ່າວຢ້ຳຫຼາຍເທື່ອແລ້ວວ່າ, ສະຖານະການແຫຼມເກົາຫຼີປະຈຸບັນພວມຜະເຊີນໜ້າກັບໂອກາດທາງປະຫວັດສາດທີ່ຫາຍາກ, ແຫຼມເກົາຫຼີບັນລຸເປົ້າໝາຍປາດສະຈາກນິວເຄຼຍ ແລະ ເສັ້ນທາງສັນຕິພາບຖາວອນໃນຕໍ່ໜ້າຫຼືບໍ່ ທີ່ສຳຄັນທີ່ສຸດກໍ່ແມ່ນການພົບປະລະຫວ່າງຜູ້ນຳສປປເກົາຫຼີ-ອາເມລິກາ. ຈີນຫວັງວ່າ ແລະ ສະໜັບສະໜູນສປປເກົາຫຼີແລະອາເມລິກາສືບຕໍ່ກ້າວໄປໜ້າພ້ອມກັນ ສະແດງຄວາມຈິງໃຈເຊິ່ງກັນແລະກັນ,ຕັ້ງໜ້າຊຸກຍູ້ວຽກງານກະກຽມການພົບປະຂອງລະຫວ່າງຜູ້ນຳສອງຝ່າຍ, ຍາດແຍ່ງໄດ້ຮັບຜົນທີ່ສອງຝ່າຍ ແລະ ປະຊາຄົມໂລກລ້ວນແຕ່ຄອງຄອຍໄດ້ຮັບ ແລະ ປະກອບສ່ວນອັນຕັ້ງໜ້າເພື່ອສ້າງຍຸກໃໝ່ທີ່ໃຫ້ແຫຼມເກົາຫຼີປາດສະຈາກນິວເຄຼຍ, ມີສັນຕິພາບ ແລະ ຄວາມຈະເລີນຮຸ່ງເຮືອງ.
