ນັກຂ່າວໄດ້ຊາບຈາກຄະນະກຳມະການສາທາລະນະສຸກ ແລະ ຄຸມກຳເນີດນະຄອນຫຼວງປັກກິ່ງໃນວັນທີ 2 ມິຖຸນານີ້ວ່ານັບແຕ່ໄດ້ປະຕິບັດ "ລະບຽບການກ່ຽວກັບຄວບຄຸມການສູບຢາຂອງນະຄອນຫຼວງປັກກິ່ງ" ເປັນເວລາ 3 ປີມານີ້, ປັດຈຸບັນ, ອັດຕາສູບຢາຂອງຜູ້ໃຫຍ່ນະຄອນຫຼວງປັກກິ່ງບັນລຸ 22,3%, ຈຳນວນຜູ້ສູບຢາໄດ້ຫຼຸດລົງປະມານ 2 ແສນຄົນ.
"ລະບຽບການກ່ຽວກັບຄວບຄຸມການສູບຢາຂອງນະຄອນຫຼວງປັກກິ່ງ" ທີ່ຖືວ່າເປັນຄຳສັ່ງຄວບຄຸມການສູບຢາທີ່ເຂັ້ມງວດທີ່ສຸດໃນປະຫວັດສາດດັ່ງກ່າວແມ່ນເລິ່ມປະຕິບັດແຕ່ວັນທີ 1 ມິຖຸນາປີ 2015, ມາຮອດປັດຈຸບັນໄດ້ 3 ປີແລ້ວ.ໂດຍກຳນົດວ່າ, ສະຖານທີ່ສາທາລະນະໃນຫ້ອງທັງໝົດລ້ວນແຕ່ຫ້າມສູບຢາ.
ໃນຂະນະທີ່ສົ່ງເສີມການເຊົາການສູບຢາ ແລະ ຄວບຄຸມການສູບຢາ. ວົງການຕ່າງໆຂອງປັກກິ່ງຍັງຕັ້ງໜ້າສະໜັບສະໜູນການສ້າງສະພາບແວດລ້ອມທີ່ປອດຄວັນຢາ, ປັດຈຸບັນຢູ່ປັກກິ່ງມີອາສາສະໝັກຄວບຄຸມການສູບຢາເກືອບ 1 ໝື່ນ 5 ພັນຄົນ. ນັບມາຮອດທ້າຍເດືອນເມສາປີນີ້, ພະນັກງານຕິດຕາມດ້ານອະນາໄມ ແລະ ສຸກຂະພາບທຸກຂັ້ນຂອງນະຄອນຫຼວງປັກກິ່ງໄດ້ດຳເນີນມກວດກາສະຖານທີ່ຄວບຄຸມການສູບຢາເກືອບ 3 ແສນເທື່ອແຫ່ງແລ້ວ.
ນອກນີ້, ນະຄອນຫຼວງປັກກິ່ງ, ນະຄອນທຽນສິນ ແລະ ແຂວງເຮີເປຈະຖືໂອກາດທີ່ຈັດງານກິລາໂອລິມປິກລະດູໜາວ ແລະ ງານກິລາໂອລິມປິກຄົນພິການລະດູໜາວປີ 2022, ຮ່ວມມືກັນສ້າງສະພາບແວດລ້ອມທີ່ປອດຄວັນຢາສູບຢູ່ 3 ແຫ່ງດັ່ງກ່າວ. ປັດຈຸບັນ, ພາກສ່ວນຄວບຄຸມພະຍາດຂອງນະຄອນຫຼວງປັກກິ່ງ,ນະຄອນທຽນສິນ ແລະ ແຂວງເຮີເປພວມແບ່ງປັນບົດຮຽນໃນການຄວບຄຸມການສູບຢາເຊິ່ງກັນແລະກັນ, ຮ່ວມມືກັນຢ່າງຮອບດ້ານເພື່ອສ້າງຕົວເມືອງອັນສວຍງາມ ແລະ ຕ້ອນຮັບງານກິລາໂອລິມປິກ, ພ້ອມກັນຊຸກຍູ້ການສ້າງສະພາບແວດລ້ອມທີ່ປອດຄວັນຢາສູບ.
