ທ່ານເບນຈາມິນ ເນທັນຢາຮູ ນາຍົກລັດຖະມົນຕີອິສຣາແອນ ກ່າວໃນກອງປະຊຸມຄະນະລັດຖະບານສະໄໝສາມັນໃນວັນທີ 3 ມິຖຸນານີ້ວ່າ: ຕົນຈະຢ້ຽມຢາມເອີຣົບ ທັງຈະປຶກສາຫາລືກັບຜູ້ນຳຂອງເຢຍລະມັນ, ຝຣັ່ງ ແລະ ອັງກິດ ກ່ຽວກັບການຈະເຮັດແນວໃດເພື່ອສືບຕໍ່ສະກັດກັ້ນແຜນການນິວເຄລຍອີຣານ.
ທ່ານເນທັນຢາຮູ ກ່າວວ່າ: ຕົນຈະເດີນທາງຢ້ຽມຢາມເອີຣົບໃນວັນທີ 4 ມິຖຸນານີ້ ເພື່ອພົບປະກັບທ່ານນາງແອງເຈີລາ ເມີແຄວ ນາຍົກລັດຖະມົນຕີເຢຍລະມັນ, ທ່ານແອມມານູແອນ ມາຄຣົງ ປະທານາທິບໍດີຝຣັ່ງ ແລະ ທ່ານນາງເທເຣຊາ ເມ ນາຍົກລັດຖະມົນຕີອັງກິດ ເພື່ອປຶກສາຫາລືສະຖານະການຢູ່ເຂດຕາເວັນອອກກາງ ແຕ່ຈຸດສຳຄັນຄືບັນຫາອີຣານ. ອິສຣາແອນຈະເນັ້ນໜັກຕໍ່ 3 ປະເທດດັ່ງກ່າວວ່າ ຈະບໍ່ອະນຸມັດໃຫ້ອີຣານມີອາວຸດນິວເຄລຍໄວ້ໃນການຄອບຄອງ ນອກນີ້, ການທີ່ສະກັດກັ້ນບໍ່ໃຫ້ອີຣານແຜ່ຂະຫຍາຍອິດທິພົນຂອງຕົນໃນເຂດຕາເວັນອອກກາງ ໂດຍສະເພາະຢູ່ຊີຣີ ກໍຈະເປັນຈຸດສຳຄັນເຊັ່ນດຽວກັນໃນການພົບປະລະຫວ່າງຕົນກັບຜູ້ນຳ 3 ປະເທດດັ່ງກ່າວ ອິນສະຣາແອນຈະສືບຕໍ່ໂຈມຕີກຳລັງທະຫານຂອງອີຣານທີ່ປະຈຳຢູ່ຊີຣີ.
