ທ່ານຣາຊິດ ອາລີມົຟ ເລຂາທິການໃຫຍ່ອົງການຮ່ວມມືຊຽງໄຮ ກ່າວຢູ່ນະຄອນຫຼວງປັກກິ່ງ ສປ ຈີນໃນວັນທີ 3 ມິຖຸນານີ້ວ່າ: ຫຼັງຈາກຈີນແລະປະເທດໃນອາຊຽນພະຍາຍາມຮ່ວມກັນ, ສະຖານະການຢູ່ເຂດທະເລຈີນໃຕ້ໄດ້ຜ່ອນຄ່າຍລົງເປັນກ້າວໆ ເຊິ່ງສອດຄ່ອງກັບຜົນປະໂຫຍດຂອງບັນດາຝ່າຍ.
ທ່ານອາລີມົຟ ໄດ້ໃຫ້ສຳພາດຕໍ່ນັກຂ່າວວ່າ: ຈີນ ແລະ ປະເທດໃນອາຊຽນໄດ້ຮັກສາການພົວພັນຢ່າງສະໜິດແໜ້ນແລະຕັ້ງໜ້າ, ຈັດຕັ້ງປະຕິບັດ "ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້" ຢ່າງຮອບດ້ານແລະມີປະສິດທິຜົນ, ເພີ່ມທະວີຄວາມໄວ້ເນື້ອເຊື່ອໃຈ ແລະການຮ່ວມມືທາງທະເລ ແລະ ຕັ້ງໜ້າຊຸກຍູ້ການປຶກສາຫາລື "ກົດແຫ່ງການປະພຶດໃນທະເລຈີນໃຕ້" ຫຼື COC.ທ່ານອາລີມົຟ ຊີ້ໃຫ້ເຫັນວ່າ: ປີ 2016, ປະເທດສະມາຊິກອົງການຮ່ວມມືຊຽງໄຮ ໄດ້ຊີ້ແຈງຫຼັກໝັ້ນຂອງຕົນໂດຍສະເພາະຕໍ່ບັນຫາທະເລຈີນໃຕ້ ໃນກອງປະຊຸມສຸດຍອດຕັສເກັນ ໂດຍບັນດາປະເທດສະມາຊິກຮັບຮອງວ່າ ຄວນຮັກສາຫຼັກການກົດໝາຍທາງທະເລບົນພື້ນຖານຫຼັກການກົດໝາຍສາກົນ ລວມທັງ "ສົນທິສັນຍາອົງການສະຫະປະຊາຊາດວ່າດ້ວຍກົດໝາຍທະເລ"; ຄວາມຂັດແຍ້ງຕ່າງໆຄວນໃຫ້ຝ່າຍທີ່ກ່ຽວຂ້ອງແກ້ໄຂດ້ວຍສັນຕິວິທີ ໂດຍຜ່ານການເຈລະຈາ ແລະປຶກສາຫາລືຢ່າງມີໄມຕີຈິດ ແລະ ຄັດຄ້ານການຫັນບັນຫາດັ່ງກ່າວໃຫ້ເປັນບັນຫາສາກົນ, ຄັດຄ້ານອິດທິກຳລັງພາຍນອກເຂົ້າແຊກແຊງ.
