ວັນທີ 4 ມິຖຸນານີ້, ທ່ານວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ເຂົ້າຮ່ວມການພົບປະທາງການລະຫວ່າງລັດຖະມົນຕີການຕ່າງປະເທດກຸ່ມປະເທດບຣິກສ໌ຢູ່ອາຟຣິກາໃຕ້ ໂດຍມີທ່ານລິນດີເວ ຊີຊູລູ ລັດຖະມົນຕີກະຊວງການຕ່າງປະເທດອາຟຣິກາໃຕ້ເປັນປະທານການພົບປະ, ທ່ານເຊີເກ ລາຟຣົຟ ລັດຖະມົນຕີກະຊວງການຕ່າງປະເທດຣັດເຊຍ, ທ່ານຊູສມາ ສວາຣາຈ ລັດຖະມົນຕີກະຊວງການຕ່າງປະເທດອິນເດຍ ແລະ ທ່ານມາກົສ ການວາວ ຮອງລັດຖະມົນຕີກະຊວງການຕ່າງປະເທດເບຣຊິນເຂົ້າຮ່ວມ.
ທ່ານວາງຢີ້ກ່າວວ່າ, ໂລກປັດຈຸບັນພວມຜະເຊີນກັບການປ່ຽນແປງທີ່ບໍ່ເຄີຍມີມາກ່ອນໃນຮອບຮ້ອຍປີ. ພາຍໃຕ້ເບື້ອງຫຼັງດັ່ງກ່າວ, ກຸ່ມປະເທດບຣິກສ໌ຄວນຖືເອົາການສ້າງ "ທົດສະວັດສີຄຳ" ທີ 2 ເປັນໂອກາດ ເພື່ອສ້າງຄວາມຜາສຸກໃຫ້ແກ່ປະຊາຊົນ 5 ປະເທດໃຫ້ຫຼາຍກວ່າເກົ່າ ແລະ ມີການປະກອບສ່ວນຫຼາຍກວ່າເກົ່າຕໍ່ສັນຕິພາບ ແລະ ການພັດທະນາຂອງໂລກ.
ຜູ້ແທນເຂົ້າຮ່ວມກອງປະຊຸມບັນດາປະເທດບຣິກສໄດ້ຕັ້ງໜ້າຕີລາຄາຕໍ່ຄວາມຄືບໜ້າອັນໃຫຍ່ຫຼວງແຫ່ງການຮ່ວມມືລະຫວ່າງປະເທດບຣິກສໃນ 10 ປີມານີ້ ແລະ ສະແດງຄວາມຊົມເຊີຍສູງຕໍ່ຈີນທີ່ໄດ້ປະກອບສ່ວນສຳຄັນ ເພື່ອຊຸກຍູ້ການຮ່ວມມືລະຫວ່າງປະເທດບຣິກສ໌ໃນຖານະເປັນປະເທດປະທານໝູນວຽນໃນປີຜ່ານມາ ໂດຍກ່າວວ່າ, ພາຍໃຕ້ເບື້ອງຫຼັງທີ່ສະຖານະການສາກົນເກີດມີການປ່ຽນແປງຢ່າງສັບສົນໃນປັດຈຸບັນ, ປະເທດບຣິກສ໌ຄວນເພີ່ມທະວີການປະສານງານ ແລະ ຮ່ວມມືກັນ, ລົງເລິກການພົວພັນຄູ່ຮ່ວມຍຸດທະສາດ, ຮ່ວມກັນຍຶດໝັ້ນລັດທິຫຼາຍຝ່າຍ, ຄັດຄ້ານລັດທິຝ່າຍດຽວ ແລະ ລັດທິປົກປ້ອງ ພ້ອມທັງປົກປ້ອງຫຼັກການພື້ນຖານແຫ່ງການພົວພັນສາກົນ.
ການພົບປະຄັ້ງນີ້ເປັນການກະກຽມໃຫ້ແກ່ກອງປະຊຸມສຸດຍອດກຸ່ມປະເທດບຣິກສທີ່ຈະຈັດຂຶ້ນຢູ່ນະຄອນຫຼວງຈອນເນສບວກໃນເດືອນກໍລະກົດໜ້ານີ້ ແລະ ຍັງໄດ້ເຜີຍແຜ່ "ບົດຖະແຫຼງຂ່າວ" ຫຼັງການພົບປະ.
 |
