ສະພາການຄ້າແລະການພັດທະນາອົງການສະຫະຫະປະຊາຊາດທີ່ມີສຳນັກງານໃຫຍ່ຕັ້ງຢູ່ເຊີແນວ ປະເທດສະວິດໄດ້ເປີດເຜີຍບົດລາຍງານໃນວັນທີ 6 ມິຖຸນານີ້ວ່າ: ປີ 2017 ຜ່ານມາ, ຈີນໄດ້ກາຍເປັນປະເທດທີ່ທຶນຕ່າງປະເທດໄຫຼເຂົ້າຫຼາຍເປັນອັນດັບສອງຂອງໂລກແລະເປັນປະເທດລົງທຶນຕໍ່ຕ່າງປະເທດຫຼາຍເປັນອັນດັບ 3 ຂອງໂລກ ແລະ ສືບຕໍ່ຄອງຖານະອັນດັບໜຶ່ງໃນບັນດາປະເທດພວມພັດທະນາທີ່ມີທຶນຕ່າງປະເທດໄຫຼເຂົ້າແລະການລົງທຶນຕໍ່ຕ່າງປະເທດ.
ບົດລາຍງານການລົງທຶນຂອງໂລກປີ 2018 ທີ່ເປີດເຜີຍໃນວັນດຽວກັນລະບຸວ່າ: ເມື່ອທຽບໃສ່ປີ 2017 ຜ່ານມາ ເຊິ່ງເສດຖະກິດແລະການຄ້າ ໂລກຂະຫຍາຍຕົວຢ່າງວ່ອງໄວ, ສິ່ງໂດດເດັ່ນນັ້ນກໍຄື ການລົງທຶນໂດຍກົງຈາກຕ່າງປະເທດ(FDI)ຂອງໂລກໃນປີ 2017 ໄດ້ຫຼຸດລົງເຖິງ 1430 ຕື້ໂດລາສະຫະລັດ, ຫຼຸດລົງ 23% ເມື່ອທຽບໃສ່ປີ 2016.
ບົດລາຍງານຍັງລະບຸຕື່ມວ່າ: ປີ 2017 ຜ່ານມາ, ຈີນໄດ້ດຶງດູດທຶນຕ່າງປະເທດບັນລຸເຖິງ 136 ຕື້ໂດລາສະຫະລັດ, ຄອງອັນດັບສອງຂອງໂລກ. ການລົງທຶນຕໍ່ຕ່າງປະເທດຂອງຈີນໄດ້ຫຼຸດລົງເຖິງ 125 ຕື້ໂດລາສະຫະລັດ ແຕ່ກໍຍັງເປັນປະເທດລົງທຶນຕໍ່ຕ່າງປະເທດຫຼາຍອັນດັບ 3 ຂອງໂລກ ແລະເປັນປະເທດພວມພັດທະນາທີ່ລົງທຶນຕໍ່ຕ່າງປະເທດຫຼາຍອັນດັບໜຶ່ງຂອງໂລກ.
