ວັນທີ 6 ມິຖຸນານີ້, ຢູ່ຫໍສະພາປະຊາຊົນປັກກິ່ງ, ທ່ານສີຈິ້ນຜິງ ປະທານປະເທດຈີນໄດ້ພົບປະເຈລະຈາກັບທ່ານ ຊູຣອນໄບ ຊິນເບຄົຟ ປະທານາທິບໍດີກຽກກິດສະຖານ. ປະມຸກລັດສອງປະເທດໄດ້ເປັນເອກະພາບກັນເຫັນດີສ້າງສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດ ແລະ ຂຽນໜ້າໃໝ່ໃນປຶ້ມປະຫວັດສາດແຫ່ງມິດຕະພາບ ແລະ ການຮ່ວມມືລະຫວ່າງສອງປະເທດ.
ທ່ານສີຈິ້ນຜິງສະແດງຄວາມຍິນດີຕ້ອນຮັບຕໍ່ທ່ານຊິນເບຄົຟທີ່ມາຢ້ຽມຢາມຈີນທາງລັດຖະກິດ ແລະ ເຂົ້າຮ່ວມກອງປະຊຸມສຸດຍອດຊິງຕາວຂອງອົງການຮ່ວມມືຊຽງໄຮ ໂດຍທ່ານກ່າວວ່າ, ກຽກກິດສະຖານເປັນໜຶ່ງໃນປະເທດທີ່ສະໜັບສະໜູນ ແລະ ເຂົ້າຮ່ວມການສ້າງ "ໜຶ່ງແລວໜຶ່ງເສັ້ນທາງ" ກ່ອນໝູ່. ຈີນຍິນດີຮ່ວມກັບກຽກກິດສະຖານຂະຫຍາຍຄວາມຄິດ ແລະ ຂຸດຄົ້ນຄວາມສາມາດບົ່ມຊ້ອນ ເພື່ອຊຸກຍູ້ໃຫ້ການຮ່ວມມືລະຫວ່າງສອງຝ່າຍກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ. ທ່ານສີຈິ້ນຜິງໄດ້ຕີລາຄາສູງຕໍ່ກຽກກິດສະຖານໄດ້ສະໜັບສະໜູນຈີນຢ່າງແຂງແຮງໃນເວລາຈີນເປັນປະເທດປະທານໝູນວຽນອົງການຮ່ວມມືຊຽງໄຮ ແລະ ກ່າວວ່າ, ຈີນຍິນດີພະຍາຍາມຮ່ວມກັບກຽກກິດສະຖານ ເພື່ອຊຸກຍູ້ໃຫ້ອົງການຮ່ວມມືຊຽງໄຮຂະຫຍາຍໄປຕາມວົງໂຄຈອນທີ່ປອດໃສ ແລະ ໜັກແໜ້ນ.
ທ່ານຊິນເບຄົຟ ກ່າວວ່າ, ກຽກກິດສະຖານສະແດງຄວາມຊົມເຊີຍຕໍ່ຜົນສຳເລັດຂອງຈີນໃນດ້ານການພັດທະນາເສດຖະກິດສັງຄົມ ແລະ ຂອບໃຈປະເທດຈີນທີ່ໄດ້ໃຫ້ການຊ່ວຍເຫຼືອແກ່ກຽກກິດສະຖານ. ກຽກກິດສະຖານຈະຍຶດໝັ້ນນະໂຍບາຍຈີນດຽວຢ່າງສະເໝີຕົ້ນສະເໝີປາຍ, ຍິນດີເພີ່ມທະວີການຮ່ວມມືກັບຈີນໃນຂົງເຂດເສດຖະກິດການຄ້າ, ວັດທະນະທຳ ແລະ ອື່ນໆ, ປະສານງານກັນໂຈມຕີອິດທິກຳລັງກໍ່ການຮ້າຍ, ອິດທິກຳລັງແບ່ງແຍກດິນແດນ ແລະ ອິດທິກຳລັງຫົວຮຸນແຮງ, ຮ່ວມກັນປົກປັກຮັກສາສັນຕິພາບ, ສະຖຽນລະພາບ ແລະ ຄວາມໝັ້ນຄົງຂອງພາກພື້ນ.
