ວັນທີ 7 ມິຖຸນານີ້ຢູ່ນະຄອນຫຼວງປັກກິ່ງ, ທ່ານກ່າວເຟິ່ງ ໂຄສົກກະຊວງການຄ້າຈີນຖະແຫຼງວ່າ: ຊຸມປີມໍ່ໆນີ້,ການຮ່ວມມືດ້ານເສດຖະກິດການຄ້າຈີນ-ຣັດເຊຍຂະຫຍາຍຕົວຢ່າງວ່ອງໄວ, ກວ້າງຂວາງ,ມີປະສິດທິຜົນແລະມີທ່າແຮງບົ່ມຊ້ອນອັນມະຫາສານ, ໃນປີ 2018 ນີ້, ຍອດມູນຄ່າການຄ້າສອງຝ່າຍຄາດວ່າຈະບັນລຸຫຼາຍກວ່າ 100 ຕື້ໂດລາສະຫະລັດ.
ປີ 2017 ຜ່ານມາ, ຍອດມູນຄ່າການຄ້າຈີນ-ຣັດເຊຍບັນລຸເຖິງ 84 ຕື້ໂດລາສະຫະລັດ, ເພີ່ມຂຶ້ນ 20,8% ເມື່ອທຽບໃສ່ປີ 2016. ນັບແຕ່ເດືອນມັງກອນຫາເດືອນເມສາຜ່ານມາ,ມູນຄ່າການຄ້າສອງຝ່າຍໄດ້ບັນລຸເຖິງ 31,2 ຕື້ໂດລາສະຫະລັດ,ເພີ່ມຂຶ້ນ 27,3% ເມື່ອທຽບໃສ່ໄລຍະດຽວກັນຂອງປີ2017. ຖືວ່າມີຈັງຫວະການເຕີບໂຕໄວທີ່ສຸດໃນດ້ານການຄ້າລະຫວ່າງຈີນກັບບັນດາຄູ່ຄ້າສຳຄັນ. ທ່ານກ່າວເຟິ່ງເປີດເຜີຍວ່າ:
"ໃນດ້ານການລົງທຶນ,ປີ 2017 ຜ່ານມາ,ຈີນໄດ້ລົງທຶນໂດຍກົງຢູ່ຣັດເຊຍບັນລຸເຖິງ 2,22 ຕື້ໂດລາສະຫະລັດ,ເພີ່ມຂຶ້ນ 72% ເມື່ອທຽບໃສ່ປີ 2016, ຈີນໄດ້ເຊັນສັນຍາກ່ຽວກັບການຮັບເໝົາໂຄງການຢູ່ຣັດເຊຍໃນມູນຄ່າ 7,75 ຕື້ໂດລາສະຫະລັດ, ເພີ່ມຂຶ້ນ 191,4% ເມື່ອທຽບໃສ່ປີ 2016, ຈັງຫວະການເຕີບໂຕແບບນີ້ຖືວ່າຢູ່ໃນແຖວໜ້າຂອງບັນດາປະເທດທີ່ຢູ່ລຽບຕາມ 'ໜຶ່ງແລວໜຶ່ງເສັ້ນທາງ'; ໃນດ້ານຂົງເຂດການຮ່ວມມື, ນອກຈາກ ພະລັງງານ,ການບິນ,ການບິນອະວະກາດ,ພື້ນຖານໂຄງລ່າງແລະຂົງເຂດອື່ນໆທີ່ສອງຝ່າຍໄດ້ຮ່ວມມືມາຫຼາຍປີແລ້ວນັ້ນ, ສອງຝ່າຍຍັງໄດ້ຕັ້ງໜ້າຊຸກຍູ້ການຮ່ວມມືໃນຂົງເຂດໃໝ່ເຊັ່ນ:ການພັດທະນາຕາເວັນອອກໄກ,ເສດຖະກິດດີຈີຕອນ,ການຄ້າເອເລັກໂຕຣນິກຂ້າມຊາດແລະອື່ນໆ ເພື່ອພະຍາຍາມສ້າງໃຫ້ເປັນຈຸດເຕີບໂຕໃໝ່ຂອງການພົວພັນດ້ານເສດຖະກິດການຄ້າລະຫວ່າງສອງຝ່າຍ."
 |
