ທ່ານປູຕິນກ່າວວ່າ ຣັດເຊຍຍັງບໍ່ຟ້າວຟັ່ງທີ່ຈະຟື້ນຟູສາຍພົວພັນກັບປະເທດຕາເວັນຕົກ

ລາຍການໂທລະພາບຖ່າຍທອດສົດ "ໂທລະສັບລົມກັບທ່ານປູຕິນໂດຍກົງ"ຄັ້ງທີ 16 ໄດ້ອອກອາກາດຢູ່ຣັດເຊຍໃນວັນທີ 7 ມິຖຸນານີ້, ທ່ານວະລາດີເມຍ ປູຕິນ ປະທານາທິບໍດີຣັດເຊຍໄດ້ຕອບຄຳຖາມຕ່າງໆຂອງປະຊາຊົນກ່ຽວກັບນະໂຍບາຍພາຍໃນແລະ ຕ່າງປະເທດຂອງຣັດເຊຍແລະອື່ນໆ. ທ່ານປູຕິນຢືນຢັນວ່າ ຣັດເຊຍຍັງບໍ່ຟ້າວຟັ່ງທີ່ຈະຟື້ນຟູສາຍພົວພັນກັບປະເທດຕາເວັນຕົກ, ແລະກອງທະຫານຣັດເຊຍກໍຈະບໍ່ຖອນອອກຈາກຊີຣີໃນໄລຍະມໍ່ໆນີ້.
ທ່ານປູຕິນກ່າວວ່າ: ຕົນບໍ່ໄດ້ຄາດຄະເນໃຫ້ຣັດເຊຍຟື້ນຟູສາຍພົວພັນກັບປະເທດຕາເວັນຕົກຄືນເປັນປົກກະຕິ, ສິ່ງທີ່ຣັດເຊຍຄວນເຮັດນັ້ນຄື: ປົກປັກຮັກສາຜົນປະໂຫຍດຂອງຕົນ. ປະເທດຕາເວັນຕົກຈະຄ່ອຍໆຮັບຮູ້ເຖິງຄວາມສຳຄັນໃນການສ້າງສາຍພົວພັນປົກກະຕິກັບຣັດເຊຍ. ທ່ານປູຕິນຊີ້ອອກວ່າ: ກອງທະຫານຣັດເຊຍຈະບໍ່ຖອນອອກຈາກຊີຣີພາຍໃນໄລຍະມໍ່ໆນີ້ ແລະການເຄື່ອນໄຫວທາງການທະຫານຂອງຣັດເຊຍຢູ່ຊີຣີໄດ້ປັບປຸງສະພາບຄວາມໝັ້ນຄົງຂອງປະເທດນີ້ໃຫ້ດີຂຶ້ນ.

ລາຍການຖ່າຍທອດສົດດັ່ງກ່າວໄດ້ເລີ່ມຈັດຂຶ້ນມາແຕ່ປີ 2001 ໂດຍໃຫ້ທ່ານປູຕິນສົນທະນາໂດຍກົງກັບປະຊາຊົນຜ່ານທາງໂທລະສັບ ແລະຕອບຄຳຖາມຂອງປະຊາຊົນກ່ຽວກັບບັນຫາຊີວິດການເປັນຢູ່ຂອງປະຊາຊົນແລະບັນຫາການບໍລິຫານປະເທດ.