ວັນທີ 7 ມິຖຸນານີ້ເປັນວັນຄົບຮອບ 1 ປີຂອງການສ້າງສຳເລັດແລະນຳໃຊ້ໂຄງການທໍ່ສົ່ງນ້ຳມັນດິບຈີນ-ມຽນມາຕອນຢູ່ຈີນ ແລະ ໃນ 1 ປີຜ່ານມາ, ມີນ້ຳມັນດິບ 8.900.000 ໂຕນໄດ້ຖືກສົ່ງໄປຮອດເມືອງຣຸ້ຍລີ້ ແຂວງຢຸນນານ ສປ ຈີນ ຈາກເກາະມາເດ ປະເທດມຽນມາ ທີ່ໄກກັນເຖິງ 760 ກວ່າກິໂລແມັດ ນັບວ່າເປັນການສະໜອງ "ເລືອດ" ອຸດສາຫະກຳໃຫ້ແກ່ການພັດທະນາເສດຖະກິດເຂດຕາເວັນຕົກສຽງໃຕ້ຈີນ.
ທໍ່ສົ່ງນ້ຳມັນດິບຈີນ-ມຽນມາ ແລະທໍ່ສົ່ງອາຍແກັສຈີນ-ມຽນມາໄດ້ສ້າງໄປຄຽງຄູ່ກັນ ແມ່ນໂຄງການຕົວແບບທີ່ສ້າງຂຶ້ນກ່ອນໝູ່ໃນການສ້າງ "ໜຶ່ງແລວໜຶ່ງເສັ້ນທາງ" ໃນນີ້, ທໍ່ສົ່ງນ້ຳມັນດິບຈີນ-ມຽນມາທັງໝົດຍາວ 1.420 ກິໂລແມັດ ແລະມີ 46% ສ້າງຢູ່ໃນດິນແດນຈີນ ຕາມການອອກແບບແລ້ວແຕ່ລະປີຈະສົ່ງນ້ຳມັນດິບໄດ້ເຖິງ 13 ລ້ານໂຕນ.
ເດືອນກໍລະກົດປີ 2013, ທໍ່ສົ່ງອາຍແກັສຈີນ-ມຽນມາເລີ່ມນຳໃຊ້ຢ່າງເປັນທາງການ ແລະມາເຖິງປັດຈຸບັນ, ນັບລວມແລ້ວໄດ້ສົ່ງອາຍແກັສຫຼາຍກວ່າ 18 ຕື້ແມັດກ້ອນ; ເດືອນມິຖຸນາປີ 2017, ທໍ່ສົ່ງນ້ຳມັນດິບຈີນ-ມຽນມາໄດ້ສ້າງສຳເລັດທັງໝົດ ແລະເລີ່ມນຳໃຊ້ຢ່າງເປັນທາງການ ເຊິ່ງເປັນຂີດໝາຍສະແດງໃຫ້ເຫັນວ່າ 4 ຊ່ອງທາງໃຫຍ່ນຳເຂົ້າພະລັງງານຂອງຈີນ ຄື ຊ່ອງທາງຕາເວັນຕົກສຽງໃຕ້, ຊ່ອງທາງຕາເວັນຕົກສຽງເໜືອ, ຊ່ອງທາງຕາເວັນອອກສຽງເໜືອ ແລະ ຊ່ອງທາງທາງທະເລ ໄດ້ສ້າງສຳເລັດໂດຍພື້ນຖານ.
