ທ່ານສີຈິ້ນຜິງ ປະທານປະເທດຈີນ ໄດ້ພົບປະກັບທ່ານເນີຊູຕັນ ນາຊາບາເອັຟ ປະທານາທິບໍດີກາຊັກສະຖານ ຢູ່ນະຄອນຫຼວງປັກກິ່ງໃນວັນທີ 7 ມິຖຸນານີ້ ແລະໂອກາດນີ້, ປະມຸກລັດສອງປະເທດໄດ້ເປັນເອກະສັນກັນຕົກລົງຈະປັບປຸງໄມຕີຈິດມິດຕະພາບອັນເປັນມູນເຊື້ອລະຫວ່າງຈີນ-ກາຊັກສະຖານ ເພື່ອຮ່ວມມືກັນບົນເສັ້ນທາງສ້າງຊາດຂອງແຕ່ລະປະເທດໃຫ້ຈະເລີນຮຸ່ງເຮືອງຍິ່ງໆຂຶ້ນ.
ທ່ານສີຈິ້ນຜິງ ກ່າວວ່າ: ກາຊັກສະຖານແມ່ນປະເທດໃກ້ຄຽງທີ່ສຳຄັນຂອງຈີນ ແລະກໍແມ່ນປະເທດໃຫຍ່ທີ່ມີບົດບາດໃນພາກພື້ນ, ຈີນຈະເຮັດຄືດັ່ງທີ່ໄດ້ປະຕິບັດຜ່ານມາ ເພື່ອເດັດດ່ຽວສະໜັບສະໜູນນະໂຍບາຍພາຍໃນແລະຕໍ່ຕ່າງປະເທດຂອງກາຊັກສະຖານ, ຍິນດີລົງເລິກການຮ່ວມມືກັບກາຊັກສະຖານໃນການປາບປາມ "ສາມອິດທິກຳລັງ" ແລະດ້ານອື່ນໆ, ແລກປ່ຽນແລະປະສານງານຢ່າງໃກ້ຊິດໃນວຽກງານສາກົນແລະພາກພື້ນ.
ທ່ານສີຈິ້ນຜິງ ກ່າວຕື່ມວ່າ: ກ່ອນໜ້ານີ້ 5 ປີ, ຂ້າພະເຈົ້າເດີນທາງຢ້ຽມຢາມກາຊັກສະຖານເປັນຄັ້ງທຳອິດ ແລະພາຍໃຕ້ການເປັນເພື່ອນຮ່ວມພາທາງຂອງທ່ານປະທານາທິບໍດີ, ຂ້າພະເຈົ້າໄດ້ສະເໜີຂໍ້ລິເລີ່ມແລວເສດຖະກິດເສັ້ນທາງສາຍໄໝເປັນຄັ້ງທຳອິດ ໃນມະຫາວິທະຍາໄລນາຊາບາເອັຟ ແລະ ໃນ 5 ປີຜ່ານມາ, ຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ກໍໄດ້ຮັບການຕອບຮັບຢ່າງຕັ້ງໜ້າຈາກປະຊາຄົມໂລກ ແລະກາຍເປັນພຶດຕິກຳຕົວຈິງທີ່ສຳຄັນໃນການຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ. ຂະນະທີ່ການຮ່ວມມືລະຫວ່າງຈີນ-ກາຊັກສະຖານໂດຍປິ່ນອ້ອມ "ໜຶ່ງແລວໜຶ່ງເສັ້ນທາງ" ໃນ 5 ປີຜ່ານມາ ກໍໄດ້ເຂົ້າສູ່ໄລຍະໃໝ່ແຫ່ງການເຊື່ອມໂຍງຢ່າງເລິກເຊິ່ງ ແລະຊຸກຍູ້ເຊິ່ງກັນແລະກັນ ສອງຝ່າຍຄວນເພີ່ມທະວີການປະສານງານດ້ານນະໂຍບາຍ ແລະ ສ້າງສະພາບໃໝ່ແຫ່ງການຮ່ວມມືດ້ານວັດທະນະທຳ.
ທ່ານນາຊາບາເອັຟ ກ່າວວ່າ: ປະເທດຕົນທະນຸຖະໜອມໄມຕີຈິດມິດຕະພາບອັນເປັນມູນເຊື້ອລະຫວ່າງສອງປະເທດ ແລະຂໍຂອບໃຈຈີນທີ່ໃຫ້ການສະໜັບສະໜູນຢ່າງແຂງແຮງໃນໄລຍະຜ່ານມານີ້. ການພັດທະນາຂອງຈີນເປັນໂອກາດສຳລັບກາຊັກສະຖານ, ກາຊັກສະຖານສະໜັບສະໜູນພາລະກິດສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ ແລະເຊື່ອໝັ້ນວ່າ ຜົນສຳເລັດຂອງຈີນກໍສອດຄ່ອງກັບຜົນປະໂຫຍດຂອງກາຊັກສະຖານເຊັ່ນດຽວກັນ.
