ເວລາ 23: 40 ໂມງຂອງວັນທີ 6 ມິຖຸນານີ້, ເຮືອບິນເໝົາລຳຂອງການບິນພົນລະເຮືອນຈີນ 2 ລຳໄດ້ລົງຈອດຢູ່ສະໜາມບິນສາກົນປິ່ນໄຫ ນະຄອນທຽນສິນ ສປ ຈີນຕາມລຳດັບຢ່າງສະໝ່ຳສະເໝີ ແລະເຈົ້າໜ້າທີ່ຕຳຫຼວດນະຄອນທຽນສິນໄດ້ຄຸມຕົວຜູ້ຕ້ອງສົງໄສກະທຳຜິດການຫຼອກລວງທາງເຄືອຂ່າຍໂທລະຄົມ ທີ່ປອມເປັນຕຳຫຼວດ, ໄອຍະການ ແລະ ສານ ທັງໝົດ 105 ຄົນກັບຄືນປະເທດຈາກອິນໂດເນເຊຍ. ກ່ອນໜ້ານີ້, ກະຊວງປ້ອງກັນຄວາມສະຫງົບຈີນໄດ້ມອບໃຫ້ອົງການຕຳຫຼວດນະຄອນທຽນສິນເປັນຜູ້ຄຸມຕົວຜູ້ຕ້ອງສົງໄສ ແລະ ດຳເນີນຄະດີທີ່ກ່ຽວຂ້ອງ.
ຜ່ານການສືບສວນ-ສອບສວນເບື້ອງຕົ້ນ, ຜູ້ຕ້ອງສົງໄສ 105 ຄົນທີ່ຖືກຄຸມຕົວກັບປະເທດເທື່ອນີ້ ໄດ້ມີສ່ວນພົວພັນເຖິງຄະດີຕົ້ມຕົວະຫຼອກລວງທາງໂທລະຄົມ 200 ກວ່າຄະດີທີ່ເກີດຂຶ້ນຢູ່ຫຼາຍແຂວງ, ເຂດປົກຄອງຕົນເອງ ແລະ ກຳແພງນະຄອນ ເຊັ່ນ ນະຄອນທຽນສິນ, ແຂວງຫູເປີຍ, ແຂວງຫູໜານ ແລະ ແຂວງຊ່ານຊີ່ ຈຳນວນເງິນໃນຄະດີມີເຖິງ 10 ກວ່າລ້ານຢວນ ແລະ ໃນຈຳນວນຜູ້ຕ້ອງສົງໄສ 105 ຄົນດັ່ງກ່າວ ມີ 10 ຄົນໄດ້ຖືກຕຳຫຼວດທ້ອງຖິ່ນປະກາດນຳຈັບຜ່ານທາງອິນເຕີເນັດມາກ່ອນແລ້ວ.
