ທ່ານເປຣນເດນ ວາມາ ໂຄສົກປະທານກອງປະຊຸມສະມັດຊາໃຫຍ່ອົງການສະຫະປະຊາຊາດຄັ້ງທີ 72 ກ່າວໃນວັນທີ 7 ມິຖຸນານີ້ວ່າ: ກອງປະຊຸມສະມັດຊາໃຫຍ່ອົງການສະຫະປະຊາຊາດກຳນົດຈະເລືອກຕັ້ງ 5 ປະເທດສະມາຊິກບໍ່ຖາວອນຂອງສະພາຄວາມໝັ້ນຄົງໃນວັນທີ 8 ມິຖຸນານີ້ ເພື່ອເຂົ້າປ່ຽນແທນ 5 ປະເທດສະມາຊິກທີ່ຈະໝົດອາຍຸການໃນທ້າຍປີນີ້.
ທ່ານວາມາ ກ່າວຕື່ມວ່າ: ປັດຈຸບັນ, ມີ 6 ປະເທດເຂົ້າຮ່ວມການເລືອກຕັ້ງດັ່ງກ່າວ ແລະເນື່ອງຈາກທີ່ນັ່ງປະເທດສະມາຊິກບໍ່ຖາວອນຂອງສະພາຄວາມໝັ້ນຄົງໄດ້ແບ່ງປັນຕາມແຕ່ລະພາກພື້ນ ສະນັ້ນ, ແບນຊິກ, ເຢຍລະມັນ, ໂດມີນີກັນ ແລະ ອາຟຣິກາໃຕ້ຈະບໍ່ມີຄູ່ແຂ່ງ, ອິນໂດເນເຊຍ ແລະ ມານດິຟຈະແຂ່ງຂັນທີ່ນັ່ງພາກພື້ນອາຊີປາຊີຟິກ.
ອີງຕາມລະບຽບການແຂ່ງຂັນເລືອກຕັ້ງ, ປະເທດສະມາຊິກບໍ່ຖາວອນຂອງສະພາຄວາມໝັ້ນຄົງຈະໃຫ້ກອງປະຊຸມສະມັດຊາໃຫຍ່ອົງການສະຫະປະຊາຊາດປ່ອນບັດປິດລັບເລືອກຕັ້ງ ແລະ ບໍ່ວ່າຈະມີຄູ່ແຂ່ງຫຼືບໍ່ກໍຕາມ, ປະເທດສະໝັກຮັບເລືອກຕັ້ງຕ່າງໆຕ້ອງໄດ້ຮັບບັດເລືອກຕັ້ງຢ່າງໜ້ອຍ 2/3 ຈຶ່ງນັບວ່າໄດ້ຮັບເລືອກຕັ້ງ. ຂະນະທີ່ 5 ປະເທດສະມາຊິກບໍ່ຖາວອນທີ່ຈະເລືອກຕັ້ງໃນວັນທີ 8 ມິຖຸນານີ້ ຈະເຂົ້າປ່ຽນແທນໂບລີວີ, ເອທີໂອປີ, ກາຊັກສະຖານ, ໂຮນລັງ ແລະ ຊູແອັດ ນັບແຕ່ວັນທີ 1 ມັງກອນປີ 2019 ເປັນຕົ້ນໄປ.
