ທ່ານສີຈິ້ນຜິງເປັນປະທານໄຂກອງປະຊຸມສຸດຍອດອົງການຮ່ວມມືຊຽງໄຮ້ຈັດຂຶ້ນຢູ່ນະຄອນຊິ່ງຕາວ
2018-06-10 09:29:35 cri
ຕາມຂ່າວ CRI: ສະພາມົນຕີປະມຸກລັດຂອງກອງປະຊຸມສຸດຍອດອົງການຮ່ວມມືຊຽງໄຮ້ຄັ້ງທີ 18 ໄດ້ໄຂຂຶ້ນຢູ່ນະຄອນຊິ່ງຕາວແຂວງຊານຕົງໃນຕອນເຊົ້າວັນທີ 10 ມິຖຸນານີ້, ທ່ານສີຈິ້ນຜິງ ເປັນປະທານກອງປະຊຸມ, ຜູ້ນຳຂອງຣັດເຊຍ, ກາຊັກສະຖານ, ກຽດກີຊິສະຖານ, ຕາຊິກີສະຖານ, ອຸສເປກີສະຖານ, ອິນເດຍ ແລະປາກີສະຖານໄດ້ຮ່ວມກັນເຂົ້າຮ່ວມກອງປະຊຸມ.
ອີງຕາມການຈັດວາງ, ຜູ້ນຳຂອງ 8 ປະເທດສະມາຊິກອົງການຮ່ວມມືຊຽງໄຮ້ໄດ້ຈັດການພົບປະເຈລະຈາໃນວົງແຄບ, ຫຼັງຈາກນັ້ນຈະຈັດກອງປະຊຸມວົງກວ້າງກັບຜູ້ນຳບັນດາປະເທດສັງເກດການແລະຜູ້ຮັບຜິດຊອບຂອງອົງການຈັດຕັ້ງສາກົນຕ່າງໆ.
ກອງປະຊຸມສຸດຍອດຊິ່ງຕາວແມ່ນກອງປະຊຸມຍຸດຍອດຄັ້ງທຳອິດທີ່ອົງການຮ່ວມມືຊຽງໄຮ້ຈັດຂຶ້ນພາຍຫຼັງໄດ້ຮັບເອົາສະມາຊິກໃໝ່ ເຊິ່ງຝ່າຍຕ່າງໆຈະລົງເລິກແລກປ່ຽນຄຳເຫັນກ່ຽວກັບສະພາບການປັດຈຸບັນ, ອະນາຄົດຂອງອົງການຮ່ວມມືຊຽງໄຮ້, ການຮ່ວມມືໃນຂົງເຂດຕ່າງໆພາຍໃຕ້ສະຖານູການໃໝ່, ກໍ່ຄືບັນຫາສາກົນແລະພາກພື້ນທີ່ສຳຄັນຕ່າງໆ. ຜູ້ນຳບັນດາປະເທດຍັງຈະເຊັນແລະປະກາດຖະແຫຼງການຊິ່ງຕາວ, ອະນຸມັດເອກະສານການຮ່ວມມືໃນຂົງເຂດຄວາມໝັ້ນຄົງ, ເສດຖະກິດ,ວັດທະນະທຳແລະບຸກຄະລາກອນ 10 ກວ່າສະບັບ.
