ຕາມຂ່າວ CRI: ຕອນຄ່ຳວັນທີ 9 ມິຖຸນານີ້, ທ່ານສີຈິ້ນຜິງ ປະທານປະເທດຈີນໄດ້ຈັດງານລ້ຽງຢູ່ສູນປະຊຸມສາກົນຊິ່ງຕາວ, ເພື່ອຕ້ອນຮັບຜູ້ນຳຕ່າງປະເທດທີ່ເຂົ້າຮ່ວມກອງປະຊຸມສຸດຍອດອົງການຮ່ວມມືຊຽງໄຮທີ່ຈັດຂຶ້ນຢູ່ນະຄອນຊິ່ງຕາວ.
ທ່ານສີຈິ້ນຜິງ ໄດ້ກ່າວປາໄສ, ໂດຍຕາງໜ້າລັດຖະບານແລະປະຊາຊົນຈີນສະແດງຄວາມຍິນດີຕ້ອນຮັບຕໍ່ຜູ້ນຳປະເທດຕ່າງໆແລະຜູ້ຮັບຜິດຊອບຂອງອົງການຈັດຕັ້ງສາກົນທີ່ມາເຂົ້າຮ່ວມ ກອງປະຊຸມສະພາມົນຕີປະມຸກລັດປະເທດສະມາຊິກອົງການຮ່ວມມືຊຽງໄຮ.
ທ່ານສີຈິ້ນຜິງ ຊີ້ໃຫ້ເຫັນວ່າ, ພາຍໃຕ້ການນຳພາຂອງ "ຈິດໃຈຊຽງໄຮ", ອົງການຮ່ວມມືຊຽງໄຮບໍ່ພຽງແຕ່ໄດ້ຮັບໝາກຜົນອັນອຸດົມສົມບູນໃນການຮ່ວມມືດ້ານຄວາມໝັ້ນຄົງ, ເສດຖະກິດ, ວັດທະນະທຳແລະອື່ນໆ, ແຕ່ຍັງໄດ້ຍວ່າງບາດກ້າວທີ່ມີລັກສະນະປະຫວັດສາດໃນດ້ານການສ້າງກົນໄກ. ປັດຈຸບັນ, ອົງການຮ່ວມມືຊຽງໄຮມີ 8 ປະເທດສະມາຊິກ, 4 ປະເທດສັງເກດການແລະຄູ່ເຈລະຈາ 6 ປະເທດ, ແມ່ນກຳລັງສຳຄັນໃນການຮັກສາຄວາມໝັ້ນຄົງຂອງພາກພື້ນ, ຊຸກຍູ້ການພັດທະນາຮ່ວມກັນແລະປັບປຸງການປົກຄອງໃນທົ່ວໂລກໃຫ້ສົມບູນຂຶ້ນ.
ພາຍຫຼັງງານລ້ຽງດັ່ງກ່າວ, ທ່ານສີຈິ້ນຜິງແລະແຂກຜູ້ມີກຽດບັນດາທ່ານໄດ້ຮ່ວມກັນຊົມການສະແດງ "ມີເພື່ອນມາຈາກບ່ອນແສນໄກ".
