ຕາມຂ່າວ CRI: ວັນທີ 10 ມິຖຸນານີ້, ທ່ານວະລາດີເມຍ ປູຕິນ ປະທານາທິບໍດີຣັດເຊຍໄດ້ຕອບຄຳຖາມຂອງນັກຂ່າວກ່ຽວກັບຜົນການຢ້ຽມຢາມຈີນແລະພາບອະນາຄົດການພັດທະນາຂອງອົງການຮ່ວມມືຊຽງໄຮ. ທ່ານກ່າວວ່າ, ການຮ່ວມມືປະສານງານລະຫວ່າງຣັດເຊຍແລະຈີນມີລະດັບສູງສົມຄວນ, ຄວນພັດທະນາຢ່າງບໍ່ຢຸດຢັ້ງ, ນີ້ບໍ່ພຽງແຕ່ມີຜົນດີຕໍ່ສາຍພົວພັນຂອງສອງຝ່າຍ, ຍັງມີຄວາມໝາຍສຳຄັນທີ່ສຸດຕໍ່ການພົວພັນສາກົນຍຸກປັດຈຸບັນ.
ທ່ານປູຕິນກ່າວວ່າ: "ພວກເຮົາບໍ່ຄວນລືມວ່າໜຶ່ງໃນການຮ່ວມມືປະສານງານລະຫວ່າງຣັດເຊຍແລະຈີນຕົ້ນຕໍແມ່ນຢູ່ໃນເວທີສາກົນ, ກໍຄືການຮ່ວມມືປະສານງານພາຍໃຕ້ຂອບອົງການສະຫະປະຊາຊາດ, ກຸ່ມ 20 ປະເທດ, ປະເທດບຣິກສ, ອົງການຮ່ວມມືຊຽງໄຮແລະອື່ນໆ"
ໃນເວລາເວົ້າເຖິງຜົນສຳເລັດຂອງກອງປະຊຸມສຸດຍອດອົງການຮ່ວມມືຊຽງໄຮແລະພາບອະນາຄົດການພັດທະນາຂອງອົງການນີ້, ທ່ານປູຕິນຊີ້ໃຫ້ເຫັນວ່າ, ກອງປະຊຸມສຸດຍອດຄັ້ງນີ້ບໍ່ພຽງແຕ່ກ່ຽວພັນເຖິງບັນຫາຕໍ່ຕ້ານລັດທິກໍ່ການຮ້າຍແລະຄວາມໝັ້ນຄົງເທົ່ານັ້ນ, ຝ່າຍຕ່າງໆທີ່ຮ່ວມປະຊຸມຍັງໄດ້ກ່າວຢ້ຳວ່າຄວນປະຕິບັດຕາມກົດລະບຽບການຄ້າສາກົນ. ທ່ານກ່າວວ່າ, ອີງຕາມຂໍ້ມູນທີ່ອົງການກອງທຶນເງິນຕາສາກົນຫຼື IMF ເປີດເຜີຍນັ້ນ, ກຳລັງຊື້ຂອງອົງການຮ່ວມມືຊຽງໄຮໄດ້ລື່ນກາຍກຸ່ມ 7 ປະເທດແລ້ວ. ພາຍໃຕ້ສະຖານະການສັບສົນໃນປັດຈຸບັນ, ຫວັງວ່າສາມາດຊຸກຍູ້ຄວາມໝັ້ນທ່ຽງຂອງຝ່າຍຕ່າງໆກ່ຽວກັບການເຄື່ອນໄຫວໃນຂົງເຂດນີ້ໄດ້.
 |
