ຕອນຄ່ຳວັນທີ 22 ມັງກອນນີ້, ຢູ່ສະຖານທູດຈີນປະຈຳລາວ, ພະນັກງານທຸກຖ້ວນໜ້າຂອງສະຖານທູດ, ຊາວລາວເຊື້ອສາຍຈີນ, ຊາວຈີນທີ່ດຳລົງຊີວິດຢູ່ລາວ, ນັກທຸລະກິດຈີນທີ່ລົງທຶນຢູ່ລາວ, ນັກສຶກສາຈີນທີ່ສຶກສາຢູ່ລາວ, ພ້ອມດ້ວຍພະນັກງານສື່ມວນຊົນຈີນທີ່ປະຈຳຢູ່ລາວແລະອື່ນໆໄດ້ຮ່ວມກັນສະເຫຼີມສະຫຼອງບຸນກຸດຈີນທີ່ເປັນບຸນປະເພນີຂອງຈີນ.
ທ່ານກ່ວນຮວາປິ່ງ, ເອກອັກຄະລັດຖະທູດຈີນປະຈຳລາວໄດ້ສະແດງຄວາມພອນໄຊອັນປະເສີດຕໍ່ຊາວລາວເຊື້ອສາຍຈີນ, ຊາວຈີນທີ່ດຳລົງຊີວິດຢູ່ລາວ, ນັກທຸລະກິດຈີນທີ່ລົງທຶນຢູ່ລາວ, ສື່ມວນຊົນຂອງຈີນປະຈຳຢູ່ລາວ, ຄູອາຈານຈີນທີ່ສິດສອນຢູ່ລາວ ແລະນັກສຶກສາຈີນທີ່ສຶກສາຢູ່ລາວເນື່ອງໃນໂອກາດບຸນກຸດຈີນຈະວຽນມາເຖິງ, ໂອກາດນີ້ທ່ານກວ່ານຮວາປິ່ງໄດ້ຝາກຄວາມຫວັງອັນຈິງໃຈຕໍ່ຄົນທັງຫຼາຍແລະຫວັງຢາກໃຫ້ຊາວລາວເຊື້ອສາຍຈີນຂອງວົງການຕ່າງໆຈົ່ງຮ່ວມກັນທຳຄວາມພະຍາຍາມເພື່ອຮັດແໜ້ນການພົວພັນທີ່ມີໄມຕີຈິດມິດຕະພາບລະຫວ່າງຈີນ-ລາວ, ຊຸກຍູ້ການຮ່ວມມືລະຫວ່າງສອງປະເທດ, ເພີ່ມຄວາມເຂົ້າໃຈກັນລະຫວ່າງປະຊາຊົນສອງປະເທດ ແລະປະກອບສ່ວນອັນໃຫຍ່ຫຼວງກວ່າເກົ່າເຂົ້າໃນການສືບທອດການພົວພັນທີ່ມີໄມຕີຈິດມິດຕະພາບລະຫວ່າງຮຸ່ນຄົນຕ່າງໆຂອງຈີນ-ລາວ.
ທ່ານກ່ວນຮວາປິ່ງກ່າວຕື່ມວ່າ, ສະຖານທູດຈີນປະຈຳລາວຈະສືບຕໍ່ພະຍາຍາມຊຸກຍູ້ຂະຫຍາຍການພົວພັນລະຫວ່າງຈີນ-ລາວໃຫ້ກ້າວເຂົ້າສູ່ລວງເລິກ. ຍຶດໝັ້ນຈຸດປະສົງທີ່ "ຖືຄົນເປັນກົກ, ດຳເນີນວຽກງານການທູດເພື່ອປະຊາຊົນ", ພະຍາຍາມຈົນສຸດຄວາມສາມາດເພື່ອສ້າງໂຄງການຊີວິດການເປັນຢູ່ຂອງປະຊາຊົນຢູ່ຕ່າງປະເທດໃຫ້ດີ, ພະຍາຍາມໃຫ້ການບໍລິການທີ່ມີຄຸນນະພາບສູງຂຶ້ນກວ່າເກົ່າ, ປົກປັກຮັກສາສິດແລະຜົນປະໂຫຍດທີ່ຊອບກົດໝາຍຂອງພີ່ນ້ອງຮ່ວມຊາດ.
