ວັນທີ 17 ກັນຍານີ້, ງານສັງສັນລະຫວ່າງທີ່ປຶກສາດ້ານການຄ້າຂອງສະຖານທູດຫຼືສະຖານກົງສຸນຈີນປະຈໍາປະເທດອາຊຽນ ກັບນັກວິສາຫະກິດຈີນ ໄດ້ຈັດຂຶ້ນຢູ່ນະຄອນນານນິງ, ເຂດປົກຄອງຕົນເອງເຜົ່າຈ້ວງກວາງຊີຂອງຈີນ ໂດຍມີທີ່ປຶກສາດ້ານການຄ້າຂອງສະຖານທູດຈີນປະຈໍາລາວ, ຫວຽດນາມ, ກໍາປູເຈຍ, ໄທ ແລະປະເທດອື່ນໆຂອງອາຊຽນເຂົ້າຮ່ວມ, ພ້ອມດຽວກັນນັ້ນກໍໄດ້ແລກປ່ຽນຄວາມຄິດຄວາມເຫັນກັບຜູ້ຕາງໜ້າຂອງວິສາຫະກິດຂອງຈີນໃນບັນຫາຫຼາຍດ້ານ ເຊັ່ນ ສະພາບລວມ, ນະໂຍບາຍ ແລະຄວາມຕ້ອງການຂອງຕະຫຼາດຂອງປະເທດອາຊຽນ ແລະອື່ນໆ.
ທ່ານຊູສີຊົງ, ທີ່ປຶກສາດ້ານການຄ້າຂອງສະຖານທູດຈີນປະຈໍາຫວຽດນາມກ່າວວ່າ, ການໄປມາຫາສູ່ກັນ ແລະການຮ່ວມມືລະຫວ່າງວິສາຫະກິດຂອງຈີນກັບຫວຽດນາມມີກໍາລັງບົ່ມຊ້ອນຈໍານວນຫຼວງຫຼາຍ, ຫວຽດນາມມີວິສາຫະກິດຫຼາຍທີ່ສຸດທີ່ເຂົ້າຮ່ວມງານວາງສະແດງສິນຄ້າຈີນ-ອາຊຽນຄັ້ງນີ້ ແລະໄດ້ສືບຕໍ່ຮັບເໝົາຮ້ານວາງສະແດງ ເຊິ່ງໄດ້ສະແດງໃຫ້ເຫັນເຖິງຄວາມມຸ່ງຫວັງຂອງວິສາຫະກິດຫວຽດນາມໃນດ້ານການຮ່ວມມືກັບວິສາຫະກິດຈີນ. ພວກເຮົາຄວນເອົາໃຈໃສ່ຮູບການການຮ່ວມມື ແລະສະພາບແວດລ້ອມຂອງຕະຫຼາດຫວຽດນາມໃຫ້ຫຼາຍກວ່າເກົ່າ, ເສີມຂະຫຍາຍທ່າແຮງຂອງຕົນ ແລະຫຼົບຫຼີກຄວາມສ່ຽງ.