ວັນທີ 21 ຫາວັນທີ 30 ກັນຍາ 1949, ກອງປະຊຸມຄົບຄະນະຂອງສະພາປຶກສາການເມືອງປະຊາຊົນຈີນຊຸດທີ 1 ໄດ້ຈັດຂຶ້ນຢູ່ຫໍຮວຍເຢິນທຳນຽບຈົ່ງນານໄຮນະຄອນເປີຍຜິງ(ນະຄອນຫຼວງປັກກິ່ງໃນປັດຈຸບັນ) ໂດຍມີຜູ້ຕາງໜ້າຂອງພັກກອມມູນິດຈີນ, ບັນດາພັກຝ່າຍປະຊາທິປະໄຕ, ບຸກຄົນທີ່ເຄື່ອນໄຫວເພື່ອປະຊາທິປະໄຕທີ່ບໍ່ສັງກັດພັກຝ່າຍໃດ, ບັນດາຄະນະຈັດຕັ້ງປະຊາຊົນພ້ອມດ້ວຍຜູ້ຕາງໜ້າຈາກວົງການຕ່າງໆໃນສັງຄົມ, ຊົນເຜົ່າສ່ວນໜ້ອຍແລະຊາວຈີນຕ່າງດ້າວໄດ້ເຂົ້າຮ່ວມກອງປະຊຸມ.
ກອງປະຊຸມໄດ້ຮັບຮອງເອົາໂຄງການການເມືອງຮ່ວມຂອງສະພາປຶກສາການເມືອງປະຊາຊົນແຫ່ງຊາດຈີນ ແລະ ກົດໝາຍການຈັດຕັ້ງຂອງສະພາປຶກສາການເມືອງປະຊາຊົນແຫ່ງຊາດຈີນ, ກົດໝາຍການຈັດຕັ້ງຂອງລັດຖະບານປະຊາຊົນສູນກາງສາທາລະນະລັດປະຊາຊົນຈີນ, ໄດ້ຜ່ານຮັບຮອງມະຕິຕົກລົງສຳຄັນ 4 ປະການວ່າດ້ວຍນະຄອນຫຼວງ, ທຸງຊາດ,ເພງຊາດແລະການໃຊ້ສັງກາດ, ໄດ້ເລືອກຕັ້ງຄະນະກຳມະການຂອງສະພາປຶກສາການເມືອງປະຊາຊົນແຫ່ງຊາດຈີນແລະຄະນະກຳມະການລັດຖະບານປະຊາຊົນສູນກາງສາທາລະນະລັດປະຊາຊົນຈີນ, ເລືອກຕັ້ງທ່ານເໝົາເຈີຕຸ່ງເປັນປະທານລັດຖະບານປະຊາຊົນສູນກາງ.
ກອງປະຊຸມຄົບຄະນະທີ່ຈັດຂຶ້ນໃນວັນທີ 30 ກັນຍາໄດ້ເປັນເອກະພາບກັນຮັບຮອງເອົາຖະແຫຼງການກອງປະຊຸມຄົບຄະນະຂອງສະພາປຶກສາການເມືອງປະຊາຊົນແຫ່ງຊາດຈີນຊຸດທີ 1 ເຊິ່ງປະກາດຢ່າງເຄັ່ງຂຶມຕໍ່ທົ່ວໂລກວ່າ "ສາທາລະນະລັດປະຊາຊົນຈີນໄດ້ສະຖາປະນາຂຶ້ນ,ປະຊາຊົນຈີນໄດ້ມີລັດຖະບານສູນກາງເປັນຂອງຕົນເອງ."
ວັນທີ 1 ຕຸລາ, ພິທີສະເຫຼີມສະຫຼອງການສ້າງຕັ້ງລັດຖະບານປະຊາຊົນສູນກາງສາທາລະນະລັດປະຊາຊົນຈີນໄດ້ຈັດຂຶ້ນຢູ່ນະຄອນຫຼວງປັກກິ່ງ, ທ່ານເໝົາເຈີຕຸ່ງ ປະທານລັດຖະບານປະຊາຊົນສູນກາງໄດ້ກ່າວປະກາດຢ່າງເຄັ່ງຂຶມຢູ່ຫໍທຽນອ່ານເມີນວ່າ "ມື້ນີ້ ລັດຖະບານປະຊາຊົນສູງກາງສາທາລະນະລັດປະຊາຊົນຈີນສ້າງຕັ້ງຂຶ້ນແລ້ວ."
ການສະຖາປະນາຂຶ້ນຂອງສາທາລະນະລັດປະຊາຊົນຈີນເປັນຂີດໝາຍແຫ່ງການສຳເລັດໜ້າທີ່ພື້ນຖານໃນປະຫວັດສາດເພື່ອຍາດແຍ່ງຄວາມເປັນເອກະລາດຂອງຊາດແລະການປົດປ່ອຍປະຊາຊົນຢ່າງມີໄຊ ເຊິ່ງເປັນເປົ້າໝາຍທີ່ຜູ້ຮັກຊາດປະກອບສ່ວນເຂົ້າໃນພາລະກິດປະຕິວັດຈຳນວນຫຼວງຫຼາຍໄດ້ບາກບັ່ນສູ້ຊົນມາແຕ່ປີ 1840 ເປັນຕົ້ນມາ, ແລະເປັນການເລີ່ມອອກເດີນທາງໃໝ່ແຫ່ງການພະຍາຍາມສູ້ຊົນເພື່ອສຳລັດໜ້າທີ່ພື້ນຖານທີ່ບັນລຸໃຫ້ປະເທດມີຄວາມຈະເລີນຮຸ່ງເຮືອງແລະຮັ່ງມີເຂັ້ມແຂງ, ປະຊາຊົນຮັ່ງມີຜາສຸກຮ່ວມກັນ ເຊິ່ງມີຄວາມໝາຍຄວາມສຳຄັນທີ່ເລິກເຊິ່ງຍາວໄກ.