ຜົນງານຂອງປະເທດຈີນໃໝ່: ແຜນການ 5 ປີຄັ້ງທຳອິດ
2014-10-07 16:10:48 cri
ໃນລະດູໃບໄມ້ປົ່ງປີ 1951, ຄະນະກຳມະການການເງິນແລະເສດຖະກິດສູນກາງໄດ້ເລີ່ມລົງມືທົດລອງວາງແຜນການພັດທະນາເສດຖະກິດສັງຄົມ 5 ປີຄັ້ງທຳອິດ, ໄດ້ໃຊ້ເວລາ 4 ປີ, ແລະໄດ້ດັດແກ້ 5 ເທື່ອ. ໃນເດືອນກໍລະກົດປີ 1955, ກອງປະຊຸມເທື່ອທີ 2 ຂອງສະພາປະຊາຊົນແຫ່ງຊາດຈີນສະໄໝທີ 1 ໄດ້ພິຈາລະນາຢ່າງເປັນທາງການແລະໄດ້ຮັບການຮັບຮອງ. ທິດທາງຊີ້ນຳຂອງແຜນການ 5 ປີຄັ້ງທຳອິດແມ່ນ, ສຸມກຳລັງສຳຄັນເພື່ອພັດທະນາອຸດສາຫະກຳໜັກ,ສ້າງພື້ນຖານໄລຍະເບື້ອງຕົ້ນຂອງການຫັນເປັນແບບອຸດສາຫະກຳຂອງຊາດແລະການຫັນເປັນທັນສະໄໝຂອງການປ້ອງກັນປະເທດ; ພັດທະນາຂະແໜງການຄົມມະນາຄົມຂົນສົ່ງ, ອຸດສາຫະກຳເບົາ, ກະສິກຳແລະການຄ້າຢ່າງສົມຄູ່ກັນ; ອົບຮົມບົ່ມສ້າງຜູ້ມີຄວາມຮູ້ຄວາມສາມາດໃນການສ້າງສາຢ່າງສົມຄູ່ກັນ; ຊຸກຍູ້ການຮ່ວມມືໃນຂະແໜງກະສິກຳແລະຫັດຖະກຳຢ່າງມີບາດກ້າວ; ສືບຕໍ່ດັດແປງອຸດສາຫະກຳການຄ້າທຶນນິຍົມ; ຮັບປະກັນໃຫ້ພາກສ່ວນສັງຄົມນິຍົມມີອັດຕາເພີ່ມຂຶ້ນຢ່າງໜັກແໜ້ນໃນເສດຖະກິດແຫ່ງຊາດ,ພ້ອມກັນນັ້ນ,ເສີມຂະຫຍາຍບົດບາດຂອງກະສິກຳສ່ວນບຸກຄົນ, ຫັດຖະກຳແລະອຸດສາຫະກຳການຄ້າທຶນນິຍົມຢ່າງຖືກຕ້ອງ; ຮັບປະກັນການຍົກລະດັບຊີວິດການເປັນຢູ່ດ້ານວັດຖຸແລະວັດທະນະທຳຂອງປະຊາຊົນໃຫ້ສູງຂຶ້ນເປັນກ້າວໆບົນພື້ນຖານພັດທະນາການຜະລິດ. ໜ້າທີ່ພື້ນຖານແມ່ນ,ພາຍໃນ 5 ປີ,ຈະສ້າງພາກສ່ວນອຸດສາຫະກຳໃໝ່ງວດໜຶ່ງທີ່ມີຂະໜາດໃຫຍ່ຫຼວງແລະມີເຕັກນິກທີ່ກ້າວໜ້າ,ພ້ອມກັນນັ້ນ,ຕ້ອງນຳໃຊ້ເຕັກນິກທີ່ທັນສະໄໝແລະກ້າວໜ້າເປີດກວ້າງແລະດັດແປງພາກສ່ວນອຸດສາຫະກຳເກົ່າ; ຕ້ອງນຳໃຊ້ຢ່າງສົມເຫດສົມຜົນແລະດັດສ້າງພື້ນຖານອຸດສາຫະກຳທາງພາກຕາເວັນອອກສຽງເໜືອ, ນະຄອນຊຽງໄຮແລະເມືອງແຄມທະເລອື່ນໆທີ່ໄດ້ມີຢູ່ແລ້ວ,ພ້ອມກັນນັ້ນ,ຈະເລີ່ມສ້າງພື້ນຖານອຸດສາຫະກຳໃໝ່ຈຳນວນໜຶ່ງຢູ່ເຂດທີ່ບໍ່ຕິດກັບທະເລ. ການວາງແຜນການ 5 ປີຄັ້ງທຳອິດອອກມານັ້ນ,ທັງໄດ້ຖອດຖອນບົດຮຽນດ້ານການສ້າງສານຳອະດີດສະຫະພາບໂຊວຽດ,ທັງໄດ້ສອດຄ່ອງກັບສະພາບຕົວຈິງຂອງຈີນ. ຜ່ານການບາກບັ່ນສູ້ຊົນເປັນເວລາ 5 ປີຂອງທົ່ວພັກແລະປະຊາຊົນທົ່ວປະເທດ, ເມື່ອຮອດທ້າຍປີ 1957,ແຜນການ 5 ປີຄັ້ງທຳອິດໄດ້ຮັບຜົນສຳເລັດຢ່າງຫຼວງຫຼາຍໂດຍເກີນຄາດໝາຍ,ແລະຈໍ່ຕົວເປັນກະແສອຸດສາຫະກຳທີ່ນຳເຂົ້າຫຼາຍທີ່ສຸດ, ມີປະສິດທິຜົນດີທີ່ສຸດແລະມີບົດບາດໃຫຍ່ທີ່ສຸດຂອງຈີນນັບແຕ່ສະໄໝໃໝ່ເປັນຕົ້ນມາ.
