ຕາມຂ່າວCRI: ຕອນເຊົ້າວັນທີ 13 ພະຈິກນີ້, ໃນເວລາທ່ານຫຼີເຄີ້ສຽງ, ນາຍົກລັດຖະມົນຕີຈີນເຂົ້າ, ໄດ້ສະເໜີຂໍ້ສະເໜີ 6 ຂໍ້ກ່ຽວກັບການຊຸກຍູ້ການເຊື່ອມໂຍງເຂົ້າກັນດ້ານເສດຖະກິດຂອງອາຊີຕາເວັນອອກໃນກອງປະຊຸມສຸດຍອດອາຊີຕາເວັນອອກຄັ້ງທີ 9 ທີ່ຈັດຂຶ້ນຢູ່ນະຄອນຫຼວງເນປີດໍຂອງມຽນມາ.
ໂອກາດການກ່າວຄຳປາໄສ, ທ່ານຫຼີເຄີ້ສຽງໄດ້ຊີ້ອອກວ່າ, ຝ່າຍຕ່າງໆຄວນຊຸກຍູ້ການເຊື່ອມໂຍງເຂົ້າກັນຂອງພາກພື້ນໃຫ້ເຂົ້າສູ່ລວງເລິກ, ເພື່ອບັນລຸການພັດທະນາແບບເຊື່ອມໂຍງເຂົ້າກັນ, ຈະເລີນຮຸ່ງເຮືອງຮ່ວມກັນ. ສຸມໃສ່ຊຸກຍູ້ການຮ່ວມມືໃນ 6 ຂົງເຂດໃຫຍ່ : ໜຶ່ງ, ຊຸກຍູ້ໃຫ້ການລົງທຶນແລະການຄ້າຢູ່ອາຊີຕາເວັນອອກມີຄວາມສະດວກ , ສອງ, ເລັ່ງລັດການເຊື່ອມຈອດກັນຂອງອາຊີຕາເວັນອອກ, ສາມ, ເປີດກວ້າງການຮ່ວມມືດ້ານການທະນາຄານຢູ່ອາຊີຕາເວັນອອກ, ສີ່, ເພີ່ມທະວີການຮ່ວມມືດ້ານການຫຼຸດຜ່ອນຄວາມທຸກຍາກຂອງອາຊີຕາເວັນອອກ , ຫ້າ, ຊຸກຍູ້ການຮ່ວມມືທາງທະເລຂອງອາຊີຕາເວັນອອກແລະ ຫົກ, ຮັດແໜ້ນການແລກປ່ຽນດ້ານວັດທະນະທຳຂອງອາຊີຕາເວັນອອກ.
ທ່ານຫຼີເຄີ້ສຽງກ່າວເນັ້ນວ່າ, ຈີນແມ່ນກຳລັງປ້ອງກັນສັນຕິພາບແລະສະເຖຍລະພາບຢູ່ໃນພາກພື້ນອາຊີຕາເວັນອອກຢ່າງສະເໝີຕົ້ນສະເໝີປາຍ, ຈະຍຶດໝັ້ນເດີນຕາມເສັ້ນທາງພັດທະນາໂດຍສັນຕິຢ່າງເດັດດ່ຽວ, ຍິນດີຮ່ວມກັບປະເທດຕ່າງໆຂອງພາກພື້ນນີ້, ສ້າງຄູ່ຮ່ວມຜົນປະໂຫຍດ, ຄູ່ຮ່ວມຄວາມຮັບຜິດຊອບແລະຄູ່ຮ່ວມຊະຕາຂອງອາຊີ.