ຫວຽດນາມ-ຈີນເຫັນດີແກ້ໄຂບັນຫາທາງທະເລຢ່າງເໝາະສົມ
2014-12-11 14:43:43 cri
ວັນທີ 2 ພຶດສະພາ 2014, ກຳປັ່ນຂອງຫວຽດນາມເລີ່ມດຳເນີນການບຸກເຂົ້າເຂດທະເລດຳເນີນງານຂອງແທ່ນຂຸດເຈາະນ້ຳມັນເຊື້ອໄຟ 981 ຂອງຈີນທີ່ກຳລັງດຳເນີນງານຢູ່ເຂດໃກ້ກັບໝູ່ເກາະຊີ່ຊ່າ, ຫຼັງຈາກນັ້ນ, ຢູ່ໃນປະເທດຫວຽດນາມ ໄດ້ເກີດເຫດການຈະລາຈົນທີ່ຕໍ່ຕ້ານປະເທດຈີນ, ການພົວພັນຈີນ-ຫວຽດນາມໄດ້ຖືກຜົນກະທົບຢ່າງຮ້າຍແຮງ. ວັນທີ 27 ສິງຫາ 2014, ເລຂາທິການໃຫຍ່ສູນກາງພັກກອມມູນິດຫວຽດນາມໄດ້ສົ່ງທູດພິເສດໄປຍັງນະຄອນຫຼວງປັກກິ່ງເພື່ອດຳເນີນການພົບປະຂັ້ນສູງລະຫວ່າງພັກກຳອຳນາດຂອງສອງປະເທດຈີນ-ຫວຽດນາມ. ຫຼັງຈາກນັ້ນ, ສອງປະເທດໄດ້ດຳເນີນການພົບປະກັນຫຼາຍເທື່ອ, ແລ້ວເຫັນດີໃຫ້ແກ້ໄຂບັນຫາທາງທະເລຢ່າງເໝາະສົມໂດຍອີງຕາມຈິດໃຈຂອງສັນຍາແລະຄວາມຮັບຮູ້ທີ່ເປັນເອກະພາບກັນແລະກ່ຽວຂ້ອງລະຫວ່າງສອງຝ່າຍ. ວັນທີ 10 ພະຈິກ 2014, ຢູ່ນະຄອນຫຼວງປັກກິ່ງ, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານເຈືອງເຕີນຊັງ ປະທານປະເທດຫວຽດນາມໃນໂອກາດໄປເຂົ້າຮ່ວມກອງປະຊຸມອາເປັກ, ໂດຍກ່າວວ່າ, ສອງຝ່າຍຄວນຮ່ວມກັນທຳຄວາມພະຍາຍາມ, ເພື່ອບູລະນະທ່າຂະຫຍາຍໃນທາງທີ່ດີຂອງການພົວພັນສອງປະເທດ.
