ທີມສາວນະຄອນຫຼວງ ແລະ ປກສ ຍິງຄູ່ຕໍ່ສູ້ເກືອບ 2 ໂຫຼ ເຕາະບານຍິງອຸດົມໄຊເກມ
2014-12-13 18:22:44 cri
ທີມສາວຈາກນະຄອນຫຼວງວຽງຈັນແລະກະຊວງປ້ອງກັນຄວາມສະຫງົບ(ປກສ)ປະເດີມສະໜາມໄດ້ຍິ່ງໃຫຍ່ສົມສັກສີ ເມື່ອໄລ່ຖະຫຼົ່ມຄູ່ຕໍ່ສູ້(ຊຽງຂວາງ ແລະໄຊຍະບູລີ)ໄປແບບບໍ່ເຫັນຝຸ່ນລວມເກືອບ 2 ໂຫຼ……ຂະນະທີ່ສຸພາວັນ ໄພວັນ ທີມຊາດຕົວເກັ່ງ ຍິງຊ່ວຍນະຄອນຫຼວງໄດ້ເຖິງ 6 ປະຕູ.
ການແຂ່ງຂັນເຕະບານຍິງ ໃນງານມະຫາກຳກິລາແຫ່ງຊາດຄັ້ງທີ Ⅹ ໄດ້ເປີດສາກຂຶ້ນແລ້ວ ໃນຕອນເຊົ້າວານນີ້(8 ທັນວາ)ທີ່ສະໜາມກິລາແຂວງອຸດົມໄຊ ໂດຍມີການລົງສະໜາມແຂ່ງຂັນ 2 ຄູ່, ໃນນີ້ ຄູ່ທີ່ມວນຊົນໃຫ້ຄວາມສົນໃຈຫຼາຍ ແມ່ນຄູ່ລະຫວ່າງນະຄອນຫຼວງວຽງຈັນ ແລະແຂວງຊຽງຂວາງ ເພາະບໍ່ຄາດຄິດວ່າຜົນອອກມາຈະເປັນໄດ້ເຖິງພຽງນີ້ ເຖິງແມ່ນວ່າທີມນະຄອນຫຼວງວຽງຈັນຈະມີຕົວຊ່ວຍລະດັບທີມຊາດເຖິງ 4 ຄົນ ປະກອບມີສຸພາວັນ ໄພວັນ ຫົວໜ້າທີມ, ນຸ້ມ ອ່າງມະຫົງສາ, ມະນີວັນ ບຸນທັນແລະສຸດດາວຮຸ້ງ ພະສີລິ. ສ່ວນຊຽງຂວາງແມ່ນບໍ່ມີທີມຊາດແມ່ນແຕ່ຄົນດຽວ.
ເກມການແຂ່ງຂັນໃນເຄິ່ງເວລາທຳອິດຂອງຄູ່ດ່ຽວກ່າວນີ້,ເຫັນໄດ້ວ່າ ເປັນນະຄອນຫຼວງວຽງຈັນທີ່ໄດ້ຄອງບານ ແລະບຸກຍິງປະຕູໄດ້ຫຼາຍກວ່າເຖິງ 80 ເປີເຊັນ ເພາະອາໄສປະສົບການ, ເຕັກນິກແລະທັກສະຂອງນັກກີລາທີ່ເໜືອກວ່າ. ສ່ວນຊຽງຂວາງ ຮູ້ຕົວວ່າເປັນຮອງແນ່ນອນແລ້ວ ຈຶ່ງໄດ້ຕັ້ງຮັບຈົນສຸດຄວາມສາມາດແລະສ່ວນກັບໄວເປັນບາງຄັ້ງຄາວ ແຕ່ກໍ່ຢຸດຄວາມແຂງແກ່ນຂອງສາວນະຄອນຫຼວງວຽງຈັນບໍ່ໄດ້ ໂດຍສະເພາະແມ່ນ ສຸພາວັນ ໄພວັນ ຕົວເກັ່ງທີ່ສາມາດຍິງປະຕູຊ່ວຍທີມໄດ້ເຖິງ ຕ ປະຕູໃນນາທີໆ 1, 8, 14, 18, 26 ແລະ 39, ພ້ອມກັນນີ້, ມະນີວັນ ບຸນທັນ ຍິງໄດ້ 4 ປະຕູໃນນາທີໆ 56, 72, 76 ແລະ 87; ກິ່ງສະຫວັນ ພະລາ ຍິງໄດ້ 2 ປະຕູໃນນາທີໆ 32 ແລະ 85; ຈາກຈອ໋ນນີ ໄຊຍະສານ ຍິງໄດ້ໃນນາທີໆ 2; ສຸລັນຍາ ລາດສະພົງ ຍິງໄດ້ໃນນາທີໆ 34; ນຸ້ມ ອ່າງມະຫົງສາຍິງໄດ້ໃນນາທີໆ 75 ແລະໂບລິ້ງ ຫຼວງຄີລີ ຍິງນາທີໆ 81. ຈົບເກມ 90 ນາທີ ສາວນະຄອນຫຼວງວຽງຈັນເອົາຊະນະໄປ 16-0 ປະຕູ ເກັບ 3 ຄະແນນໄປຄອງຢ່າງສະບາຍ. ສຳລັບນັດຕໍ່ໄປແມ່ນຈະພົບກັບທີມຕົວເຕັງອີກທີມໜຶ່ງກໍ່ຄື ປກສ ໃນວັນທີ 10 ທັນວານີ້ ເວລາ 8:00 ໂມງ. ສ່ວນທີມສາວແຂວງຊຽງຂວາງຈະພົບກັບທີມ ແຂວງໄຊຍະບູລີ ໃນວັນທີ 12 ທັນວາ 2014 ເວລາ 8:00 ໂມງ.
ຂະນະດຽວກັນນີ້, ທີມສາວ ປກສ ກໍ່ໂຟຊອນເກັ່ງບໍ່ໜ້ອຍໜ້າທີມ ນະຄອນຫຼວງວຽງຈັນ ເມື່ອສາມາດໄລ່ຖະຫຼົ່ມ ທີມສາວແຂວງໄຊຍະບູລີ ໄປ 7-0 ປະຕູ ເກັບ 3 ຄະແນນໄປຄອງໄດ້ສຳເລັດ. ສຳລັບນັດຕໍ່ໄປ ໄຊຍະບູລີຈະພົບກັບອຸດົມໄຊ ເຈົ້າພາບໃນວັນທີ 10 ທັນວາ 2014 ເວລາ 10:00 ໂມງ.
ນອກຈາກນີ້,ໃນມື້ດຽວກັນ ຍັງມີການແຂ່ງຂັນເຕະບານຊາຍ 4 ຄູ່ ຜົນະກົດວ່າ ປກສ ສະເໝີໄຊຍະບູລີ 1-1 ປະຕູ, ອັດຕະປື ຊະນະ ຫຼວງນ້ຳທາ 3 -0 ປະຕູ, ຫຼວງພະບາງ ສະໝີ ຄຳມ່ວນ 1-1 ປະຕູ ແລະອຸດົມໄຊ ເຈົ້າພາບ ຖະຫຼົ່ມ ຜົ້ງສາລີ 5-0 ປະຕູ.
(ໂດຍ ດາວໃໝ່ ລາຍງານຈາກແຂວງອຸດົມໄຊ)