ສະຫວັນນະເຂດປະເດີມສະໜາມສວຍງາມຖະຫຼົ່ມຜົ້າງສາລີ 3-0 ເຕະບານຊາຍອຸດົມໄຊເກມ
2014-12-13 17:21:31 cri
ທິມເຕະບານແຂວງສະຫວັນນະເຂດລົງປະເດີມສະໜາມໄດ້ຢ່າງສວຍງາມສາມາດໄລ່ຖະຫຼົ່ມທິມແຂວງຜົ້າງສາລີ 3-0 ປະຕູເກັບ 3 ຄະແນນໄປຄອງໄດ້ສຳເລັດໃນການແຂ່ງຂັນເຕະບານຊາຍຮອບຄັດເລືອກໃນງານມະຫະກຳກິລາແຫ່ງຊາດຄັ້ງທີ Ⅹ ຫຼືອຸດົມໄຊເກມທີ່ຈະໄດ້ເປີດສາກຢ່າງເປັນທາງການລະຫວ່າງວັນທີ 13-21 ທັນວາ 2014. ໂດຍການແຂ່ງຂັນໃນນັດນີ້ ທັງສອງທິມລ້ວນແລ້ວແຕ່ໃຊ້ຕົວຈິງລົງສະໜາມເພື່ອເກັບ 3 ຄະແນນທຳອິດຂອງທິມ, ເຊິ່ງພໍແຕ່ກຳມະການເປົ່າໝາກວີດ, ສະຫວັນນະເຂດກໍ່ເປີດເກມບຸກເຂົ້າໃສ່ທັນທີ ເຊິ່ງບຸກຈາກຂວາໄປຊ້າຍ ໂດຍມີຄອນສະຫວັນ ສີຫາວົງ ນັກກິລາທິມຊາດເປັນຕົວປ່ວນເກມແລະກໍ່ມີໂອກາດທຳປະຕູຫຼາຍຄັ້ງແຕ່ບໍ່ສຳເລັດ. ຂະນະທີ່ຜົ້າງສາລີ ອາໃສເກມຮັບແລ້ວສວນກັບໄວ ແຕ່ໂອກາດຍິງປະຕູຍັງມີໜ້ອຍ. ຈົນມານາທີໆ 18 ຄອນສະຫວັນ ສີຫາວົງກໍ່ມາຍິງປະຕູໃຫ້ສະຫວັນນະເຂດຂຶ້ນນຳໄປກ່ອນ 1-0 ປະຕູ. ຫຼັງຈາກນັ້ນ ສະຫວັນນະເຂດຍິງຫຼິ້ນກໍ່ຍິງໄດ້ໃຈ ເປີດເກມບຸກເຂົ້າໃສ່ຢ່າງເຕັມສູດ ແລະກໍ່ມີໂອກາດຄອງບານໄດ້ຫຼາຍກວ່າແຕ່ກໍ່ຍັງເຮັດຍຫງັຜົ້າງສາລີເພີ່ມບໍ່ໄດ້. ສ່ວນຜົ້າງສາລີກໍ່ບໍ່ລົດລະໃນຄວາມພະຍາຍາມຫວັງຈະຕີສະໝີໃຫ້ໄດ້, ແຕ່ກໍ່ບໍ່ສຳເລັດຈົບເກມໃນເຄິ່ງເວລາທຳອິດສະຫວັນນະເຂດເປັນຝ່າຍຂຶ້ນນຳໄປກ່ອນ 1-0 ປະຕູ.
ໃນເຄິ່ງເວລາທີ 2 ກໍ່ຍັງແມ່ນສະຫວັນນະເຂດທີ່ເປັນຝ່າຍຄອງບານຫຼາຍກວ່າ ແລະກໍ່ເປັນຝ່າຍປັ້ນເກມບຸກເຂົ້າໃສ່ຢ່າງຕໍ່ເນື່ອງ ຈົນເຮັດໃຫ້ກອງຫຼັງຂອງທິມຜົ້າງສາລີປັ່ນປ່ວນ, ຈົນເຮັດໃຫ້ຄອນສະຫວັນ ສີຫາວົງ ລຸດກັບດັກລຳໜ້າຂອງກອງຫຼັງຜົ້ງສາລີ ເຂົ້າໄປຍິງແບບຈະໆ ເປັນປະຕູທີ 2 ຂອງຕົວເອງ ກໍ່ຄືປະຕູທີ 2 ຂອງທິມ. ຫຼັງຈາກນັ້ນ ຜົ້າງສາລີກໍ່ເປີດເກມບຸກເຂົ້າແລກເພື່ອຫວັງຕີໄຂ່ແຕກໃຫ້ໄດ້ ແລະ ກໍ່ມີໂອກາດຍິງປະຕູຫຼາຍຄັ້ງແຕ່ກໍ່ບໍ່ຜ່ານມືຜູ້ຮັກສາປະຕູຂອງສະຫວັນນະເຂດໄດ້ເຮັດໃຫ້ເກມເຂັ້ມຂຸ້ນຂຶ້ນ.
