ແຂວງບໍລິຄຳໄຊ ຄວ້າໄດ້ 2 ຫຼຽນຄຳ ປະເພດລອຍແບບທຳມະດາ 800 ແມັດຊາຍ ແລະ ລອຍແບບແມງກະເບື້ອ 50 ແມັດຊາຍ ໃນການແຂ່ງຂັນກິລາລອຍນ້ຳ ງານມະຫາກຳກິລາແຫ່ງຊາດຄັ້ງທີ Ⅹ ຫຼື ອຸດົມໄຊ ເກມ ທີ່ຈະມີພິທີເປີດຢ່າງເປັນທາງການ ລະຫວ່າງວັນທີ 13—21 ທັນວານີ້ ທີ່ແຂວງອຸດົມໄຊ.
ເມື່ອວັນທີ 10 ກັນຍາ ຜ່ານມາ ທີ່ສະລອຍນ້ຳແຂວງອຸດົມໄຊ ໄດ້ມີການແຂ່ງຂັນກິລາລອຍນ້ຳ ໃນງານມະຫາກຳກິລາແຫ່ງຊາດ ຄັ້ງທີ Ⅹ ຫຼື ອຸດົມໄຊ ເກມ ໂດຍມີການຊີງຫຼຽນຄຳ ໃນ 9 ລາຍການ ປະກອບມີ ລອຍແບບທຳມະດາ 200 ແມັດຊາຍ, ລອຍແບບທຳມະດາ 200 ແມັດຍິງ, ລອຍແບບທຳມະດາ 800 ແມັດຊາຍ, ລອຍແບບແມງກະເບື້ອ 50 ແມັດຊາຍ, ລອຍກົບ 50 ແມັດຍິງ, ລອຍແມງກະເບື້ອ 50 ແມັດຍິງ, ລອຍທຳມະດາ 100 ແມັດຊາຍ, ລອຍດ່ຽວປະສົມ 200 ແມັດຍິງ ແລະ ລອຍທີມທຳມະດາ 4x200 ແມັດຊາຍ. ຜ່ານການແຂ່ງຂັນຜົນປາກົດວ່າ: ແຂວງບໍລິຄຳໄຊ ຄວ້າໄດ້ 2 ຫຼຽນຄຳ ປະເພດລອຍແບບທຳມະດາ 800 ແມັດຊາຍ ຈາກທ້າວປາດຖະໜາ ອິນທະວົງ ແລະ ລອຍແບບແມງກະເບື້ອ 50 ແມັດຊາຍ ຈາກທ້າວ ສາຍລົມ ສຸວັນນະລາ ພ້ອມກັນນີ້ ຍັງໄດ້ອີກ 1 ຫຼຽນທອງ ປະເພດລອຍທຳມະດາ 100 ແມັດຊາຍ ຈາກທ້າວ ວັດທະນາ ສຸທິວົງ.
ສ່ວນ ແຂວງສະຫວັນນະເຂດ ໄດ້ 1 ຫຼຽນຄຳ ປະເພດລອຍແບບທຳມະດາ 200 ແມັດຍິງ ຈາກນາງແວວມະນີ ສິລິພອນ ພ້ອມກັບ 2 ຫຼຽນເງິນ ປະເພດລອຍແມງກະເບື້ອ 50 ແມັດຍິງ ແລະ ລອຍດ່ຽວປະສົມ 200 ແມັດຍິງ, ແຂວງຫຼວງພະບາງ ໄດ້ 1 ຫຼຽນຄຳ ປະເພດລອຍແບບທຳມະດາ 800 ແມັດຊາຍ, ລອຍທີມທຳມະດາ 4x200 ແມັດຊາຍ ແລະ 1 ຫຼຽນທອງ ປະເພດລອຍແບບທຳມະດາ 200 ແມັດຍິງ, ແຂວງຈຳປາສັກ ໄດ້ 1 ຫຼຽນຄຳ ປະເພດລອຍທີມທຳມະດາ 4x200 ແມັດຊາຍ ພ້ອມກັບ 1 ຫຼຽນເງິນ ຈາກປະເພດ ລອຍກົບ 50 ແມັດຍິງ ແລະ 3 ຫຼຽນທອງ ຈາກປະເພດລອຍແບບທຳມະດາ 800 ແມັດຊາຍ, ລອຍແມງກະເບື້ອ 50 ແມັດຊາຍ ແລະ ລອຍແມງກະເບື້ອ 50 ແມັດຍິງ ແລະ ກະຊວງພາຍໃນ ໄດ້ 1 ຫຼຽນເງິນ ຈາກປະເພດລອຍທຳມະດາ 100 ແມັດຊາຍ, ແຂວງອຸດົມໄຊ ເຈົ້າພາບ ໄດ້ 1 ຫຼຽນຄຳ ປະເພດລອຍກົບ 50 ແມັດຍິງ ຈາກນາງ ເທບອັກສອນ ພ້ອມກັນ 1 ຫຼຽນເງິນ ປະເພດລອຍແບບທຳມະດາ 200 ແມັດຍິງ ແລະ 2 ຫຼຽນທອງ ປະເພດລອຍແບບທຳມະດາ 200 ແມັດຊາຍ ແລະ ລອຍທີມທຳມະດາ 4x200 ແມັດຊາຍ, ກະຊວງປ້ອງກັນຄວາມສະຫງົບ (ປກສ) ໄດ້ 1 ຫຼຽນຄຳ ປະເພດ ລອຍແມງກະເບື້ອ 50 ແມັດຍິງ ຈາກນາງ ສຸລຳພອນ ເກີດຫຼ້າ ພ້ອມກັບ 1 ຫຼຽນເງິນ ປະເພດລອຍແບບທຳມະດາ 200 ແມັດຊາຍ ແລະ 2 ຫຼຽນທອງ ຈາກປະເພດລອຍກົບ 50 ແມັດຍິງ ແລະ ປະເພດລອຍດ່ຽວປະສົມ 200 ແມັດຍິງ, ນະຄອນຫຼວງວຽງຈັນ ໄດ້ 1 ຫຼຽນຄຳ ລອຍທຳມະດາ 100 ແມັດຊາຍ ຈາກທ້າວ ສຸກັນວົງໄຊ ພ້ອມກັບ 1 ຫຼຽນເງິນ ລອຍແບບແມງກະເບື້ອ 50 ແມັດຊາຍ, ແຂວງວຽງຈັນ ໄດ້ 1 ຫຼຽນເງິນ ປະເພດລອຍທຳມະດາ 100 ແມັດຊາຍ ຈາກທ້າວ ເຊີເກ້ ສີຫານຸວົງ.
ສຳລັບການແຂ່ງຂັນກິລາລອຍນ້ຳ ໃນງານອຸດົມໄຊ ເກມ ຄັ້ງນີ້ ຈະດຳເນີນໄປຈົນເຖິງວັນທີ 12 ທັນວາ 2014 ໂດຍຈະມີການແຂ່ງຂັນອີກ 22 ລາຍການຈຶ່ງຈະສຳເລັດ.