ນະຄອນຫຼວງວຽງຈັນ ຄວ້າມາໄດ້ອີກ 3 ຫຼຽນຄຳ ພາຍຫຼັງກ່ອນໜ້ານີ້ ຄວ້າໄດ້ 2 ຫຼຽນຄຳ ໃນການແຂ່ງຂັນກິລາແລ່ນ—ລານ ງານມະຫາກຳກິລາແຫ່ງຊາດ ຄັ້ງທີ Ⅹ ຫຼື ອຸດົມໄຊ ເກມ ທີ່ຈະໄດ້ເປີດສາດຢ່າງເປັນທາງການ ລະຫວ່າງວັນທີ 13—21 ທັນວານີ້ ທີ່ແຂວງອຸດົມໄຊ.
ການແຂ່ງຂັນກິລາແລ່ນ—ລານ ງານມະຫາກຳກິລາແຫ່ງຊາດ ຄັ້ງທີ Ⅹ ຫຼື ອຸດົມໄຊ ເກມ ໄດ້ດຳເນີນມາເປັນມື້ທີ 2 ໃນວັນທີ 10 ທັນວາ ຜ່ານມາ ທີ່ສະໜາມກິລາແຂວງ ໂດຍມີການຊີງໄຊ 10 ລາຍການ ຜົນປາກົດວ່າ: ນັກກິລານະຄອນຫຼວງວຽງຈັນ ຄວ້າໄປໄດ້ອີກ 4 ຫຼຽນຄຳ ຈາກນາງ ມັດ ຖິ່ນມະນາວ ປະເພດຊັດຫຼາວຍິງ, ທ້າວ ສີສະຫວັດ ທຳມະວົງຈິດ ປະເພດແລ່ນ 3.000 ແມັດວິບາກຊາຍ ແລະ ນາງ ພອນໄຊ ປາວສະຫວັດ ປະເພດແກວ່ງຈານ, ພ້ອມນີ້ ຍັງໄດ້ 1 ຫຼຽນເງິນ ຈາກນາງ ສຸກສະຫວັນ ປະເພດແລ່ນ 2.000 ແມັດວິບາກຍິງ. ຂະນະທີ່ກ່ອນໜ້ານີ້ ຄວ້າໄດ້ 2 ຫຼຽນຄຳ ຈາກນາງ ມັດ ຖິນມະນາວ ປະເພດແກ່ວງຄ້ອນຍິງ ແລະ ນາງ ມະນີວັນ ຈັນທະວົງ ປະເພດແລ່ນ 100 ແມັດຂ້າມຮົ້ວ. ມາຮອດປັດຈຸບັນ ນະຄອນຫຼວງວຽງຈັນ ໄດ້ໄປແລ້ວ 5 ຫຼຽນຄຳ ໃນກິລາປະເພດດັ່ງກ່າວ.
ສ່ວນແຂວງຈຳປາສັກ ຄວ້າໄດ້ 1 ຫຼຽນຄຳ ຈາກນາງ ຫວານໃຈ ແກ້ວຄຳດີ ປະເພດແລ່ນ 2.000 ແມັດວິບາກຍິງ, ແຂວງວຽງຈັນ ໄດ້ 1 ຫຼຽນເງິນ ຈາກປະເພດແລ່ນ 3.000 ແມັດວິບາກຊາຍ, 1 ຫຼຽນທອງ ປະເພດແລ່ນ 2.000 ແມັດວິບາກຍິງ, ກະຊວງປ້ອງກັນຄວາມສະຫງົບ ໄດ້ 1 ຫຼຽນເງິນ ຈາກນາງ ສຸດພະສອນ ຜັນວາດວົງສຸກ ປະເພດຊັດຫຼາວຍິງ, ກະຊວງປ້ອງກັນປະເທດ ໄດ້ 1 ຫຼຽນເງິນປະເພດແກວ່ງຈານຍິງ, ແຂວງສະຫວັນນະເຂດ ໄດ້ 1 ຫຼຽນທອງ ປະເພດຊັດຫຼາວຍິງ, ແຂວງຫຼວງນ້ຳທາໄດ້ 1 ຫຼຽນທອງ ຈາກ ປະເພດແລ່ນ 3.000 ແມັດວິບາກຊາຍ ແລະ ແຂວງອຸດົມໄຊ ໄດ້ 1 ຫຼຽນທອງຈາກປະເພດແກວ່ງຈານ.
ຂະນະທີ່ລາຍງານຂ່າວຢູ່ນີ້ ຍັງມີການດຳເນີນການແຂ່ງຂັນອີກ 6 ລາຍການ ປະກອບມີ ແລ່ນ 200 ແມັດຍິງ, ແລ່ນ 200 ແມັດຊາຍ, ແລ່ນ 1.500 ແມັດຍິງ, ແລ່ນ 1.500 ແມັດຊາຍ, ແລ່ນ 400 ແມັດຂ້າມຮົ້ວຍິງ ແລະ ແລ່ນ 400 ແມັດຂ້າມຮົ້ວຊາຍ. ສ່ວນຜົນຈະເປັນແນວໃດຈະລາຍງານໃຫ້ຊາບພາຍຫຼັງ.
 |
