ນັກເຕະບານແຂວງຈຳປາສັກ ໄລ່ຕ້ອນເອົາຊະນະ ທີມກະຊວງປ້ອງກັນປະເທດ (ກອງທັບ) ໄປ 3—1 ປະຕູ ເກັບໄຊເປັນນັດທີສອງຕິດຕໍ່ກັນ ຂຶ້ນເປັນທີມນຳກຸ່ມ ກ ຊົ່ວຄາວ…ຂະນະທີ່ ທີມອຸດົມໄຊເຈົ້າພາບ ມີໂອກາດລອຍນ້ຳເຂົ້າຮອບທີສອງແລ້ວເຖິງ 90 ເປີເຊັນ ພາຍຫຼັງ ລົງແຂ່ງຂັນ 4 ນັດ ຊະນະ 3 ນັດ ສະເໝີ 1 ນັດ ມີ 10 ຄະແນນ ໃນການແຂ່ງຂັນເຕະບານຊາຍ ງານມະຫາກຳກິລາແຫ່ງຊາດ ຄັ້ງທີ Ⅹ ຫຼື ອຸດົມໄຊ ເກມ ທີ່ຈະໄດ້ມີພິທີເປີດຢ່າງເປັນທາງການ ລະຫວ່າງວັນທີ 13—21 ທັນວານີ້.
ການແຂ່ງຂັນເຕະບານຊາຍຮອບຄັດເລືອກ ງານມະຫາກຳກິລາແຫ່ງຊາດ ຄັ້ງທີ Ⅹ ໃນວັນທີ 11 ທັນວານີ້ ທີ່ສະໜາມກິລາແຂວງອຸດົມໄຊ ໄດ້ມີການລົງສະໜາມແຂ່ງຂັນ 2 ຄູ່ ໃນກຸ່ມ ກ, ໃນນີ້ ຄູ່ທຳອິດເປັນການພົບກັນລະຫວ່າງ ທີມແຂວງຈຳປາສັກ ຕົວເຕັງໃນກຸ່ມນີ້ ແລະທີມກະຊວງປ້ອງກັນປະເທດ, ເຊິ່ງການລົງສະໜາມຄັ້ງນີ້ ແມ່ນເປັນນັດທີສອງຂອງທັງສອງທີມ. ຜ່ານການແຂ່ງຂັນ ປາກົດວ່າ ໃນເຄິ່ງເວລາທຳອິດ ທັງສອງທີມຕ່າງກໍ່ເປີດເກມບຸກເຂົ້າໃສ່ກັນ ເພື່ອຫວັງຍິງປະຕູຂຶ້ນນຳກ່ອນ ແຕ່ກໍ່ບໍ່ເປັນຜົນ ຈົນມານາທີໆ 32 ກອງເຊຍ ທີມກອງທັບກໍ່ໄດ້ເຮທົ່ວທັງສະໜາມ ເມື່ອ ໄຊສົງຄາມ ຈຳປາທອງ ຍິງປະຕູໃຫ້ກອງທັບຂຶ້ນນຳໄປກ່ອນ 1—0 ປະຕູ. ຂະນະດຽວກັນ ບໍ່ພໍເທົ່າໃດນາທີ ກອງເຊຍ ທີມຈຳປາສັກ ກໍ່ໄດ້ເຮເຊັ່ນກັນ ເມື່ອ ສັງວອນ ພິມມະເສນມາຍິງປະຕູຕີສະເໝີໄດ້ ໃນນາທີໆ 35. ຫຼັງຈາກນັ້ນ ທັງສອງທີມກໍ່ຍິງປະຕູກັນເພີ່ມບໍ່ໄດ້ຈົບເຄິ່ງເວລາທຳອິດ ທັງສອງທີມສະເໝີກັນໄປ 1—1 ປະຕູ.
ໃນເຄິ່ງເວລາທີສອງ ທັງສອງທີມກໍ່ໄດ້ປ່ຽນກັນບຸກປ່ຽນກັນຮັບ ແຕ່ກໍ່ແມ່ນທີມຈຳປາສັກ ທີ່ໄດ້ປະຕູຂຶ້ນນຳກ່ອນ ໃນນາທີໆ 51 ຈາກ ໄຊຍາ ເມືອງມະນີ. ຫຼັງຈາກເສຍປະຕູທີສອງແລ້ວທີມກອງທັບ ກໍ່ເປີດເກມບຸກຢ່າງເຕັມທີ່ ເພື່ອໄລ່ຕີສະເໝີໃຫ້ໄດ້ ແຕ່ກໍ່ບໍ່ເປັນຜົນ ຖືກ ຈຳປາສັກ ຍິງນຳຮ່າງໄປອີກ ເປັນ 3—1 ຈາກ ໄຊຍາ ເມືອງມະນີ ຄົນເກົ່າ ໃນນາທີໆ 64. ທັງນີ້ ເຖິງແມ່ນວ່າ ກອງທັບ ຈະເສຍປຽບ ແລະ ຖືກກົດດັນ ແຕ່ກໍ່ຍັງບໍ່ລົດລະໃນຄວາມພະຍາຍາມຈະຍິງປະຕູຂຶ້ນມາຕີຕື້ນ ຫຼື ຕີໃຫ້ສະເໝີ ແຕ່ໂອກາດບໍ່ເຂົ້າຂ້າມ ຈົບ 90 ນາທີ ເປັນຝ່າຍ ຈຳປາສັກ ເອົາຊະນະໄປ 3—1 ປະຕູ ເປັນໄຊຊະນະນັດທີສອງຕິດຕໍ່ກັນ ມີ 6 ຄະແນນ ຂຶ້ນເປັນທີມນຳກຸ່ມ ກ ຊົ່ວຄາວ. ສ່ວນກອງທັບມີ 3 ຄະແນນ ເທົ່າກັບນະຄອນຫຼວງວຽງຈັນ ແຕ່ລູກໄດ້ຫຼາຍກວ່າ.
ສ່ວນຜົນການແຂ່ງຂັນຄູ່ທີສອງ ລະຫວ່າງ ທີມແຂວງບໍ່ແກ້ວ ແລະ ນະຄອນຫຼວງວຽງຈັນ ປາກົດວ່າ ທີມບໍ່ແກ້ວ ໂຊຜົນງານໄດ້ດີ ເຖິງຈະເປັນແຂວງນ້ອຍ ສາມາດຢັນສະເໝີ 0—0 ປະຕູໃນເຄິ່ງເວລາທຳອິດ. ຂະນະທີ່ ໃນເຄິ່ງເວລາທີສອງ ເກມ ຂອງທັງສອງທີມບໍ່ໄດ້ຂາດກັນຕ່າງຝ່າຍຕ່າງກໍ່ມີໂອກາດໄດ້ຍິງປະຕູກັນຫຼາຍຄັ້ງ ແຕ່ບໍ່ເປັນຜົນ ຈົນນາທີໆ 61 ນະຄອນຫຼວງວຽງຈັນ ໄດ້ຈຸດໂທດ ແລະ ສິດທິເດດ ຂັນທະວົງ (ທີມຊາດ) ເປັນຜູ້ຍິງເຂົ້າໄປຢ່າງສວຍງາມ ຈົບເຄິ່ງເວລາທີສອງ ເຮັດໃຫ້ນະຄອນຫຼວງວຽງຈັນ ເອົາຊະນະບໍ່ແກ້ວ ໄປແບບວຸດວິດ 1—0 ປະຕູ.
ຂະນະທີ່ ທີມອຸດົມໄຊ ເຈົ້າພາບ ມີໂອກາດລອຍລຳເຂົ້າຮອບທີສອງແກ້ວເຖິງ 90 ເປີເຊັນພາຍຫຼັງ ລົງແຂ່ງຂັນ 4 ນັດ ຊະນະ 3 ນັດ ສະເໝີ 1 ນັດ ມີ 10 ຄະແນນ ເປັນທີມນຳ ກຸ່ມ ຂ ແຕ່ຍັງໄດ້ລຸ້ນ ທີມສະຫວັນນະເຂດ ທີ່ຫາກໍ່ລົງສະໜາມ 2 ນັດ ຊະນະ 1 ນັດ ສະເໝີ 1 ນັດ ມີ 4 ຄະແນນ ແລະ ທີມ ປກສ ກໍ່ມີ 4 ຄະແນນ ເຊັ່ນກັນ ພາຍຫຼັງລົງສະໜາມ 2 ນັດ ຊະນະ 1 ນັດ ສະເໝີ 1 ນັດ. ສ່ວນໄຊຍະບູລີ ແລະ ຜົ້ງສາລີ ແມ່ນມີໂອກາດບໍ່ຫຼາຍທີ່ຈະຜ່ານເຂົ້າຮອບສອງໄດ້.