ໃນວັນທີ 11 ທັນວາ, ລົດນັກຂ່າວ CRI FM93 MHz ໄດ້ອອກເດີນທາງຈາກວຽງຈັນ ມຸ້ງໜ້າສູ່ ແຂວງ ອຸດົມໄຊ ເພື່ອຮ່ວມລາຍງານຂ່າວພິທີເປີດການແຂ່ງຂັນກິລາແຫ່ງຊາດຄັ້ງທີ 10 ຢູ່ ແຂວງ ອຸດົມໄຊ ໃນວັນທີ 13 ທັນວາ 2014, ໂດຍທີມງານນັກຂ່າວ CRI ປະກອບມີ: ດວງພະຈັນ, ແກ້ວປະເສີດ, ລັດຕະນະພອນ ແລະ ສຸກສົມປອງ, ຊຶ່ງການເດີນທາງດັ່ງກ່າວ ນີ້, ກໍເປັນຄັ້ງທຳອິດ ທີ່ນັກຂ່າວ CRI ຄື: ດວງພະຈັນ, ແກ້ວປະເສີດ ແລະ ສຸກສົມປອງ ທີ່ຈະໄດ້ມາແຂວງ ອຸດົມໄຊ, ແຕ່ ສຳລັບ ລັດຕະນະພອນ ແມ່ນເປັນຄັ້ງທີ 2 ແລ້ວ ທີ່ໄດ້ມາ. ຊຶ່ງ ລົດເກັງຄັນນ້ອຍສີດຳ ທີ່ໃຊ້ແລ່ນຮັບໃຊ້ໃນການເກັບກຳຂ່າວ ຄັ້ງນີ້ ກໍໄດ້ຂັບຂີ່ໄປຕາມເສັ້ນທາງ 13 ເໜືອ, ກ່ອນຈະ ໄດ້ມາຢຸດພັກ ທີ່ແຂວງ ຫຼວງພະບາງ ໜຶ່ງຄືນ ແລະ ໃນຕອນເຊົ້າ ວັນທີ 12 ກໍໄດ້ເດີນທາງມຸ້ງໜ້າຕໍ່ສູ່ແຂວງ ອຸດົມໄຊ, ການເດີນທາງ ແມ່ນມີການຈອດລົດ ພັກເຊົາ ແວ່ຊົມທິວທັດທຳມະຊາດອັນສວຍງາມຂອງທາງພາກເໜືອ ຊຶ່ງ ແກ້ວປະເສີດ ທີ່ຂັບລົດ ໄດ້ກ່າວວ່າ: ພູຜາປ່າໄມ້ ຢູ່ ແຂວງ ພາກເໜືອແມ່ນງາມຫຼາຍ, ເຊັ່ນດຽວກັບ ສຸກສົມ ປອງ ທີ່ໄດ້ລົງເກັບຖ່າຍຮູບພາບໃນຕອນພັກເຊົາ ເພາະຄວາມສວຍງາມ ແລະ ຢາກເກັບພາບໄວ້ເປັນຄວາມຊົງຈຳ ຄັ້ງໜຶ່ງທີ່ມາແຂວງ ອຸດົມໄຊ. ຮອດເວລາ 18 ໂມງ ລົດນັກຂ່າວ CRI ກໍໄດ້ມາເຖີງແຂວງ ອຸດົມໄຊ ຕາມທີ່ຕັ້ງໃຈ, ຊຶ່ງເຫັນໄດ້ວ່າ ແຂວງ ອຸດົມໄຊ ນີ້ສວຍງາມຫຼາຍ, ມີການປະດັບເອ້ຍ້ອງ, ຕິດທຸງຊາດ, ປ້າຍຄຳຂັວນງານ ກິລາແຫ່ງຊາດຕາມເສັ້ນທາງສອງຝາກຂ້າງ ແລະ ທາງແຂວງ ອຸດົມໄຊ ກໍພ້ອມແລ້ວ ໃນການເປັນເຈົ້າພາບຈັດງານແຂ່ງຂັນກິລາແຫ່ງຊາດ ຄັ້ງທີ 10 ນີ້.